ٹی ایم سی کو عوام کی حمایت پہلے سے زیادہ حاصل ہے: وزیر جاوید احمد خان

ترنمول کانگریس کی جانب سے اسمبلی انتخابات 2021 کے لئے امیدواروں کے ناموں کے اعلان کے بعد سینئر رہنما اور وزیر جاوید احمد خان کو مبارکباد دینے کے لیے ان کے حامیوں کی بھیڑ امڈ پڑی۔

مغربی بنگال میں منعقد ہونے والے اسمبلی انتخابات 2021 سے قبل سیاسی جماعتوں کی جانب سے اپنے اپنے امیدواروں کے ناموں کے اعلان کا سلسلہ جاری ہو گیا ہے۔ حکمراں جماعت ترنمول کانگریس سمیت دیگر اپوزیشن جماعتوں کانگریس، لفٹ فرنٹ اور انڈین سیکولر فرنٹ اتحاد نے اپنے اپنے امیدواروں کے ناموں کا اعلان کیا۔

ترنمول کانگریس کے اعلان کردہ امیدواروں کی فہرست میں سنئیر رہنما اور وزیر جاوید احمد خان کے نام بھی شامل ہے۔

ترنمول کانگریس کی جانب سے اسمبلی انتخابات 2021 کے لئے امیدواروں کے ناموں کے اعلان کے بعد سینئر رہنما اور وزیر جاوید احمد خان کو مبارکباد دینے کے لیے ان کے حامیوں کی بھیڑ امڈ پڑی۔

حامیوں کی مبارکباد اور نیک خواہشات قبول کرنے کے بعد سینئر رہنما اور وزیر جاوید احمد خان نے ای ٹی وی بھارت سے گفتگو کرتے ہوئے ترنمول کانگریس کے امیدواروں کے ناموں پر تبادلہ خیال کیا۔

ان کا کہنا ہے کہ پارٹی کی سربراہ ممتا بنرجی نے مضبوط اور متوازن امیدواروں کو میدان میں اتارنے کا اعلان کیا، جن میں سماج کے تمام شعبے سے تعلق رکھنے والے لوگ شامل ہیں۔

انہوں نے کہا کہ 50 خواتین کو ٹکٹ دیا گیا ہے جبکہ متعدد تجربہ کار رہنماؤں کو ڈراپ کرکے 40 نئے لوگوں کو اسمبلی انتخابات میں قسمت آزمانے کا موقع دیا گیا ہے، جن بھارتی کرکٹر منوج تیواری بھی شامل ہیں۔

سینئر رہنما جاوید احمد خان کا کہنا ہے کہ جو لوگ چلے گئے ہیں ان سے ترنمول کانگریس کو کوئی فرق پڑنے والا نہیں ہے۔

انہوں نے کہا کہ آج حالات یہ ہے کہ بی جے پی کے قومی صدر جے پی نڈا کے جلوس سے لوگوں نے دوری بنالی ہے۔ شھبندو ادھیکاری کے جلسے و جلوس میں بھی لوگوں کی بھیڑ نہیں ہو رہی ہے۔

ترنمول کانگریس کے رہنما کا کہنا ہے کہ ترنمول کانگریس کے خاتمے کی بات کرنے والی بی جے پی اسمبلی انتخابات سے تنہا ہو جائے گی۔

واضح رہے کہ مغربی بنگال میں 294 سیٹوں کے لئے اسمبلی انتخابات اس مرتبہ آٹھ مراحل میں ہوں گے۔ 27 مارچ کو پہلے مرحلے میں ووٹ ڈالے جائیں گے۔ گزشتہ اسمبلی انتخابات میں ممتا بنرجی کی قیادت والی حکمراں جماعت 294 میں سے 211 سیٹز جیت کر اقتدار میں آئی تھی۔