یاس نامی طوفان سے متاثر جنوبی 24 پرگنہ کے سندربن کے مختلف بلاکوں کے عوام کو امداد نہیں ٹھوس ترقیاتی منصوبہ چاہیئے جس سے وہ چین و سکون کے ساتھ زندگی گزار سکیں۔
گزشتہ 26 مئی کو خلیج بنگال میں ہواؤں کے سخت دباؤ کے بعد بننے کے سبب یاس نامی بھیانک طوفان نے جنوبی 24 پرگنہ، شمالی 24 پرگنہ اور مشرقی مدنی پور میں زبردست تباہی مچائی تھی، طوفان کے ایک ماہ گزر جانے کے باوجود سندربن کے بیشتر بلاکوں میں تباہی کا منظر آج بھی برقرار ہے۔ چاروں طرف کچے مکانات کے بکھرے ہوئے ملبے پڑے ہوئے ہیں۔ لوگوں کے اندر مایوسی چھائی ہوئی ہے، سرکار امداد کے لاکھ دعوے کرتی ہیں لیکن زمین پر کچھ نظر نہیں آتا ہے۔ یہاں کے لوگوں کو سماجی تنظیم کی آمد کا شدت سے انتظار ہوتا ہے تاکہ وہ اپنی بھوک کو مٹا سکیں۔
دکھن رائے پور گرام پنچایت کے نائب پردھان کا کہنا ہے کہ سندربن بلاک میں اکثر و بیشتر طوفان آتے ہیں، یہاں امداد سے زیادہ ٹھوس ترقیاتی منصوبوں کی ضرورت ہے۔ اس سے بھی زیادہ افسوسناک بات یہ ہے کہ سمندر کا پانی سندربن کے مختلف بلاکوں میں داخل ہونے کے سبب سینکڑوں ایکڑ زرخیز زمین فی الحال کھیتی کے لائق نہیں رہی۔ مچھلی کے کاروباری بھی متاثر ہوئے ہیں۔ اسے دوبارہ شروع کرنے میں تقریباً چھ سے آٹھ مہینے لگ سکتے ہیں۔ رکن اسمبلی سمیر کمار جانا کا کہنا ہے کہ حکومت کی جانب سے طوفان سے متاثر لوگوں کی ہر ممکن مدد کی جا رہی ہے۔ بہت جلد حالات معمول پر آجائیں گے۔ اس سلسلے میں سندربن بلاک کے سری دھر(پاتھر پرتیما) کے پنچایت پردھان پرودت برمن کہتے ہیں کہ حقیقت یہ ہے کہ ضلع کے بیشتر بلاک پوری طرح سے تباہ ہو چکے ہیں، لوگوں کے پاس کھانے پینے کی کمی پڑ گئی ہے۔ سمندر کا پانی سندربن کے مختلف بلاکوں میں داخل ہوگیا جس کے سبب سینکڑوں ایکٹر زرخیز زمین فی الحال کھیتی کے لائق نہیں ہے۔
مزید پڑھیں: طوفان سے متاثر سندربن کے باشندوں کے درمیان راشن کٹس کی تقسیم
واضح رہے کہ گزشتہ 26 مئی کو خلیج بنگال میں ہواؤں کا سخت دباؤ بننے کے سبب یاس نامی بھیانک طوفان سے جنوبی 24 پرگنہ، شمالی 24 پرگنہ اور مشرقی مدنی پور میں زبردست تباہی مچی ہے۔
