فرفرہ شریف کے پیرزادہ طہ صدیقی نے کہا کہ بنگال کے مسلمان اسدالدین اویسی کے جھانسے میں نہیں آنے والے ہیں۔
آل انڈیا مجلس اتحاد المسلمین کے فرفرہ شریف کے پیرزادہ عباس صدیقی کے ساتھ مل کر اسمبلی انتخابات لڑنے کے اعلان کے بعد مغربی بنگال کی سیاست میں ہلچل مچ گئی ہے۔
حکمراں جماعت ترنمول کانگریس، لیفٹ فرنٹ اور اس کی سولہ حلیف جماعتیں کانگریس سمیت تمام ملی اداروں کی جانب سے اویسی کی سیاست میں انٹری کے اعلان کی مذمت کی جا رہی ہے۔
فرفرہ شریف کے پیرزادہ طٰہٰ صدیقی نے کہا کہ آل انڈیا مجلس اتحاد المسلمین مغربی بنگال میں اسمبلی انتخابات لڑنا چاہتی ہے۔ ہم سب کو اچھی طرح سے معلوم ہے۔
انہوں نے کہا کہ 'مجلس اتحاد المسلمین کے سربراہ اسدالدین اویسی خود نہیں آئے ہیں، انہیں بھیجا گیا ہے کیوںکہ اویسی کو معلوم نہیں ہے کہ مغربی بنگال میں مسلمانوں کی کتنی آبادی ہے۔ بنگال کے مسلمانوں کی پہلی پسند کون ہے۔ سب کچھ جاننے کے باوجود یہاں آنے کا کیا مطلب ہو سکتا ہے۔ ہم سب اچھی طرح سے جانتے ہیں۔'