Calcutta HC راج بھون کے باہر ترنمول کانگریس کے احتجاج پر عدالت سے حکومت کو سوالوں کا سامنا

کلکتہ ہائی کورٹ نے آج ریاستی حکومت سے سوال کیا ہے کہ اگر ترنمول کانگریس راج بھون کے باہر دھرنا دے سکتی ہے تو مہاکرن کے باہر دھرنا کیوں نہیں دیا جاسکتا ۔ جسٹس جئے سین گپتا نے اس سلسلے میں ریاست سے وضاحت طلب کی ہے۔ ریاستی حکومت کو 16 اکتوبر تک ہائی کورٹ میں اپنی وضاحت پیش کرنی ہوگی۔

کولکاتا:ریاستی محکمہ محنت کے عارضی کارکن مہاکرن کے سامنے دھرنے پر بیٹھنا چاہتے تھے۔ لیکن کولکاتا پولیس نے اس کی اجازت نہیں دی ہے۔ اس کے بعد عارضی کارکنوں نے پولیس کے فیصلے کو چیلنج کرتے ہوئے ہائی کورٹ میں مقدمہ دائر کیا ہے۔ جب کیس آج سماعت کے لیے آیا تو جسٹس جوئے سین گپتا نے ریاست کے موقف کی وضاحت طلب کی ہے۔

ترنمول کانگریس 5 اکتوبر سے راج بھون کے سامنے احتجاج کر رہی ہے۔ دھرنے کی قیادت ترنمول کانگریس کے آل انڈیا جنرل سکریٹری ابھیشیک بنرجی کررہے ہیں۔ راج بھون کی انتظامیہ نے ریاستی حکومت کو خط لکھ کر اس سوال کا جواب مانگا ہے کہ دفعہ 144 برقرار رہنے کے باوجود راج بھون کے سامنے دھرنا کیسے جاری ہے۔ بی جے پی نے بھی یہی سوال اٹھایا تاہم، آج دوپہر گورنر سی وی آنند بوس نے ترنمول کانگریس کے لیڈرابھیشیک بنرجی سے ملاقات کی۔

راج بھون کے سامنے حکمراں پارٹی کے اس دھرنے کی وجہ سے ریاستی حکومت کو ہائی کورٹ میں سوالات کا سامنا کرنا پڑا۔ وکلاء اور سیاست دان اس بارے میں متجسس ہیں کہ ریاستی حکومت عدالت میں کیا بحث کر تی ہے۔

واضح رہے کہ گزشتہ روز مغربی بنگال کی حکمراں جماعت ترنمول کانگریس کے جنرل سیکریٹری ابھیشیک بنرجی نے سو روزہ روزگار سمیت دیگر ترقیاتی منصوبوں کے فنڈز روکے جانے پر بی جے پی کی قیادت والی مرکزی حکومت کے خلاف گورنر ہاوس کے باہر دھرنے پر بیٹھ گئے تھے۔