الیکشن ختم، متحدہ محاذ بھی ختم: سیتا رام یچوری

سیتا رام یچوری کا کہنا ہے کہ 'محاذ اسمبلی انتخابات کے لیے بنا تھا۔ الیکشن ختم ہو جانے کے بعد اب محاذ کا کوئی مطلب نہیں ہے۔'

مغربی بنگال 2021 اسمبلی انتخابات سے قبل ریاست میں ایک نیا سیاسی محاذ گزشتہ 26 فروری کو بریگیڈ میدان میں وجود میں آیا تھا جس میں لیفٹ فرنٹ، پردیش کانگریس اور آئی ایس ایف شامل تھے۔ انتخابات کے نتائج کے بعد پردیش کانگریس اور لیفٹ فرنٹ صفر پر آ گئے جبکہ آئی ایس ایف کو ایک سیٹ حاصل ہوا۔

متحدہ محاذ کی اس طرح منھ کے بل گرنے کے بعد سے ہی محاذ کے وجود کو لے کر سوال اٹھ رہے تھے۔ بالآخر جمعہ کے روز سی پی آئی ایم کے جنرل سیکریٹری سیتا رام یچوری نے آج تمام قیاس آرائیوں کو ختم کرتے ہوئے اعلان کر دیا کہ الیکشن ختم ہو جانے کے بعد متحدہ محاذ بھی ختم ہو گیا ہے۔

بنگال میں پردیش کانگریس اور بایاں محاذ کے درمیان 2016 میں بھی اتحاد ہوا تھا۔ 2019 کے لوک سبھا الیکشن میں بھی اتحاد ہوتے ہوتے رہ گیا تھا۔

سیتا رام یچوری کا کہنا ہے کہ 'محاذ اسمبلی انتخابات کے لیے بنا تھا۔ الیکشن ختم ہو جانے کے بعد اب محاذ کا کوئی مطلب نہیں ہے۔'

دوسری جانب پردیش کانگریس کے صدر ادھیر رنجن چودھری کا کہنا ہے کہ 'اتحاد ختم کرنے کا فیصلہ یکطرفہ ہے 2016 میں بھی بایاں محاذ نے ہی یہ فیصلہ کیا تھا۔ 2021 میں بھی ان کے طرف سے ہی اتحاد ختم کیا گیا ان کے مطابق اتحاد کی ضرورت نہیں ہے جبکہ ہم ایسا نہیں سوچتے ہیں۔'