مغربی بنگال: سخت نگرانی میں مکمل لاک ڈاؤن

ریاست کے مختلف ناکہ پر آنے جانے والی گاڑیوں کی جانچ کی جا رہی تھیں۔ کئی جگہوں پر ڈرون کی مدد سے لاک ڈاؤن پر نظر رکھی جا رہی تھیں۔

ریاست مغربی بنگال میں کورونا وائرس کے بڑھتے معاملات کو دیکھتے ہوئے ریاستی حکومت نے مکمل لاک ڈاؤن کی میعاد میں 31 اگست تک توسیع کر دی ہے۔

گزشتہ 5 اگست کو بھی ریاستی سطح پر مکمل لاک ڈاؤن نافذ ہونے کے باوجود رام مندر سنگ بنیاد کی وجہ سے جگہ جگہ پر بڑے پیمانے پر لاک ڈاؤن کی خلاف ورزی کی گئی تھی لیکن آج کے لاک ڈاؤن کے دوران خلاف ورزی کے معاملے پیش نہیں آئے۔ پولیس کی طرف سے سخت نگرانی کے دوران لاک ڈاؤن کی کوئی خلاف ورزی نہ کرے اس پر گہری نظر تھی۔

دراصل لاک ڈاؤن کو کامیاب بنانے کے لئے کولکاتا شہر و اطراف میں حکومت نے بڑے پیمانے پر پولیس کی تعیناتی کی ہے۔ کولکاتا کے مختلف علاقوں میں پولیس ڈرون کے ذریعے نگرانی کر رہی تھی کیونکہ گزشتہ 5 اگست کو لاک ڈاؤن کے دوران بڑے پیمانے پر لاک ڈاؤن کی خلاف ورزی کی گئی تھی۔

وہیں 5 اگست کو کئی جگہوں پر لاک ڈاؤن کی خلاف ورزی کرتے ہوئے رام مندر کے سنگ بنیاد کا جشن منائے جانے سے کشیدگی بھی پھیل گئی تھی۔ جس کی وجہ سے آج پولیس کی طرف سے سخت نگرانی رکھی گئی تھی۔

واضح رہے کہ 'ریاست میں کورونا وائرس کے بڑھتے معاملات کو دیکھتے ہوئے ریاستی حکومت نے ہفتے میں دو دن کا مکمل لاک ڈاؤن نافذ کرنے کا فیصلہ لیا تھا، اگست کے مہینے میں پورے 9 دنوں کا مکمل لاک ڈاؤن رہے گا۔'