کولکاتا:مغربی بنگال میں پنچایت انتخابات کے لئے ڈالے گئے ووٹوں کی گنتی جاری ہے اس درمیان رہاست کے مختلف اضلاع میں تشدد کا بازار گرم ہے۔مختلف اضلاع میں جاری تشدد کے دوران متعدد افراد کے ہلاک ہونے کی اطلاع ہے جس میں بی جے پی کے کارکنان بھی شامل ہیں۔ مغربی بنگال میں جاری تشدد کے درمیان بی جے پی کی فیکٹ فائنڈنگ ٹیم تشدد کی اصل وجہ کا پتہ لگانے کے لئے کولکاتا پہنچی ہے۔کولکاتا میںپریس کانفرنس کے دوران بی جے پی کے رکن پارلیمان اور سنئیر رہنما روی شنکر پرشاد نے کہاکہ مغربی بنگال میں پنچایت سے پہلے اور اس کے بعد جاری تشدد کے واقعات باعث تشویش ہے۔
رکن پارلیمان روی شنکر پرشاد نے کہاکہ مغربی بنگال میں جاری تشدد پر اپوزیشن جماعتیں خاموش کیوں ہیں۔نریندر مودی کی حکومت کو اقتدار سے ہٹانے کے لئے تمام اپوزیشن جماعتیں یکجا ہوئیں لیکن کسی نے ابھی تک بنگال میں جاری تشدد کی مذمت نہیں کی ہے۔کیا ان کا یکجا ہونا سیاسی مفاد پرستی ہے۔انہیں اقتدار کے سوائے کسی دوسری چیز سے کوئی مطلب نہیں ہے۔ انہوں نے کہاکہ میں راہل گاندھی سے سوال پوچھنا چاہتا ہوں کہ مغربی بنگال پنچایت انتخابات میں ان کی پارٹی کے حامیوں کو نہیں مارا گیا،آپ کی خاموشی کی وجہ کیا ہے۔بی جے پی کی سب سے زیادہ مخالفت کرنے والی سی پی ایم کے رہنما سیتا رام یچوری سے سوال کرنا چاہئے کہ وہ اپنی پارٹی کے رہنماوں اور کارکنان کی موت پر خاموشی کیوں ہیں۔