ٹی ایم سی کے رہنما پر رشوت خوری کا الزام

مغربی بنگال کے ندیا ضلع کے شانتی پور پنچایت سیمتی کے ایکزیکییٹو رکن اور ترنمول کانگریس کے رہنما شیخ شاہنواز پر پردھان منتری آواس یوجنا کے تحت گھر دلانے کے نام پر لوگوں سے ناجائز پیسے لینے کا الزام عائد کیا گیا ہے۔

پنچایت رکن شیخ شاہنواز کے خلاف شانتی پور کے مختلف علاقوں میں پوسٹر لگائے گئے، پوسٹر میں ان کے خلاف 'کٹ منی' سمیت متعدد الزامات عائد کیے گئے ہیں۔

پنچایت رکن شیخ شاہنواز پر الزام ہے کہ انہوں نے شانتی پور پنچایت میں رہنے والے لوگوں سے پردھان منتری آواس یوجنا کے تحت گھر دلانے کے نام پر لوگوں سے 20 سے 30 ہزار روپیے لیے ہیں۔

رکن پنچایت شیخ شاہنواز کا کہنا ہے کہ ان پر بے بنیاد الزامات لگائے گئے ہیں، بے بنیاد الزام کے ذریعہ انہیں بدنام کرنے کی سازش کی جارہی ہے۔ انہوں نے کہا کہ اگر الزام سچ ہے تو اسے ثابت کریں، ابھی تک ایک بھی شخص نے میرے خلاف شکایت درج نہیں کرائی ہے۔

شیخ شاہنواز کا کہنا ہے کہ ترنمول کانگریس کے ہی چند لوگ انہیں بدنام کرنے کی سازش کررہے ہیں۔ ان لوگوں نے ہی علاقے میں میرے خلاف پوسٹر لگوائے ہیں۔
دوسری طرف ترنمول کانگریس کے رہنما جمال الدین کا کہنا ہے کہ شیخ شاہنواز کے خلاف ابھی تک شکایت موصول نہیں ہوئی ہے، اس لئے ہم ان کے خلاف کچھ بھی نہیں کہہ سکتے۔