ممتابنرجی کو ترقیاتی کاموں سے کوئی نہیں روک سکتا: وزیر پارتھو چٹرجی

وزیر پارتھو چٹرجی نے کہا کہ وزیراعلیٰ ممتا بنرجی کو ترقیاتی کاموں سے روکنے کی ناکام کوششیں کی جارہی ہیں لیکن وہ کامیاب نہیں ہوں گے۔

مغربی بنگال حکمراں جماعت ترنمول کانگریس کے سینیئر رہنما اور وزیر پارتھو چٹرجی نے نامہ نگاروں سے خطاب کرتے ہوئے کہا کہ ترقیاتی منصوبوں کو سازش کے تحت روکا جا سکتا ہے لیکن ترقیاتی کاموں کو انجام دینے والوں کو روکنا ناممکن ہے۔

انہوں نے کہا کہ پورے ملک کو بی جے پی کی قیادت والی مرکزی حکومت کی ناقص پالیسی کے بارے میں معلوم ہے، وہ ہر محاذ پر ناکام ہو چکی ہے۔

ریاستی وزیر کا کہنا ہے کہ آج کل ریاست میں جو کچھ بھی ہو رہا ہے وہ اسمبلی انتخابات 2021 میں کراری شکست کا نتیجہ ہے۔ بی جے پی کے اعلیٰ رہنماؤں نے بنگال کے لوگوں کے بارے میں غلط اندازہ لگاکر انتخابی میدان میں اترے تھے۔
انہوں نے کہا کہ بیرونی ریاستوں سے تعلق رکھنے والے بی جے پی کے رہنما وزیراعلیٰ ممتا بنرجی اور عام لوگوں کو روک نہیں سکتے ہیں۔

وزیراعلیٰ ممتا بنرجی

انہوں نے روکنے کی کوشش کی تو لوگوں نے ممتابنرجی کو تاریخی اور غیرمعمولی کامیابی دلاکر تیسری مرتبہ وزیراعلیٰ بنایا۔

انہوں نے کہا کہ میرے خیال سے مغربی بنگال میں بی جے پی کے بارے میں زیادہ باتیں کرنے کی ضرورت نہیں ہے کیونکہ ان کے لئے ریاست میں کوئی جگہ نہیں ہے۔

ریاستی وزیر کا کہنا ہے کہ ریٹائرڈ چیف سکریٹری الاپن بنرجی کے بارے میں کچھ بھی نہیں کہنا ہے، مغربی بنگال کی حکومت اور عوام دونوں ان کے ساتھ کھڑے ہیں۔