Chandra Kumar Bose Resigns from BJP بی جے پی لیڈر چندر کمار بوس نے پارٹی چھوڑی

نیتا جی سبھاش چندر بوس کے پوتے اوربھارتیہ جنتا پارٹی (بی جے پی) کے رہنما چندر کمار بوس نے پارٹی قیادت کی طرف سے مبینہ طور پر نظر انداز کیے جانے کی وجہ سے پارٹی چھوڑ دی ہے اور دعویٰ کیا ہے کہ تنظیم صحیح سمت میں نہیں جا رہی ہے۔

کولکاتا: چندر کمار بوس 2016 میں مغربی بنگال میں بی جے پی کے نائب صدر تھے اور انہیں 2020 میں ہٹا دیا گیا تھا۔ انہوں نے بی جے پی کے ٹکٹ پر کئی انتخابی لڑائیاں بھی لڑیں لیکن ہر بار ہار گئے تھے۔

بدھ کو اپنا عہدہ چھوڑنے کے بعد انہوں نے اس بات پر افسوس کا اظہار کیا کہ انہیں سبھاش چندر بوس کے نظریہ کو پھیلانے کے لئے مرکز یا ریاستی سطح پر پارٹی کی طرف سے کوئی تعاون نہیں ملا۔ انہوں نے پارٹی چھوڑنے کی وجہ بتاتے ہوئے کہا کہ ”پارٹی کے ساتھ رہنے کے منفی اثر پڑا۔“

انہوں نے الزام لگایا کہ وہ ”موجودہ حالات میں ”پارٹی کے ساتھ کام نہیں کر سکتے اور ”پولرائزیشن، ووٹ بینک کی سیاست اور تقسیم کی سیاست“نے مغربی بنگال میں پارٹی کے امکانات کو تباہ کر دیا ہے۔

انہوں نے دعویٰ کیا کہ انہوں نے کئی تجاویز بھیجیں کہ پارٹی کو کیسے آگے بڑھایا جائے، جنہیں نظر انداز کر دیا گیا۔مسٹر بوس نے 2016 میں ہوڑہ میں ایک ریلی میں مرکزی وزیر داخلہ امت شاہ کی موجودگی میں بی جے پی میں شامل ہوئے تھے۔

انہوں نے 2016 کے ریاستی اسمبلی انتخابات اور 2019 کے لوک سبھا انتخابات بی جے پی کے ٹکٹ پر لڑے۔ وہ دونوں الیکشن ہار گئے تھے۔مسٹر بوس کے پارٹی چھوڑنے کو لے کر بی جے پی قیادت کی طرف سے فی الحال کوئی ردعمل سامنے نہیں آیا ہے۔