تالاب میں ہزاروں مچھلیوں کے مرنے سے لاکھوں کا نقصان

مغربی بنگال کے ضلع مالدہ کے رتوا کے ایک نمبر بلاک میں واقع ایک تالاب کا پانی زہر آلودہ ہونے کے سبب ہزاروں مچھلیاں مرگئیں، جس سے کاروباری کو لاکھوں روپے کا نقصان ہوا ہے۔

ریاست مغربی بنگال کے ضلع مالدہ کے رتوا کے گرام پنچایت کے بلاک میں ایک تالاب میں ہزاروں مچھلیاں مری ہوئی پائی گئیں۔ تالاب میں ہزاروں مچھلیاں مرکر سطح پر آگئیں تھیں۔ اس واقعے کے بعد علاقے میں سنسنی پھیل گئی ہے۔

ملازم محمد قطب اللہ نے کہا کہ آج صبح جب تالاب میں مچھلیوں کو خوراک دینے کے لیے آیا تو مری ہوئی مچھلیوں کو دیکھ کر حیران رہ گیا۔

تالاب میں ہزاروں مچھلیوں کے مرنے سے لاکھوں کا نقصان

ملازم نے کہا کہ تالاب میں مچھلی پروری کے کاروبار کرنے والے ریاض الحق کو فورا اس کی اطلاع دی گئی۔ ملازم قطب اللہ نے مزید کہا کہ تالاب کے پانی میں زہر ملانے کی وجہ سے ہزاروں مچھلیاں مری ہیں۔ دشمنی کی وجہ سے تالاب کے پانی میں زہر ملایا گیا ہے۔ اس سے تقریباً سات سے آٹھ لاکھ روپے کا نقصان ہوا ہے اور پنچایت سے مالی مدد کرنے کا مطالبہ کیا گیا ہے تاکہ نقصان کی بھر پائی ہو سکے۔

دوسری طرف تالاب کے کیئر ٹیکر ریاض الحق نے کہا کہ تالاب کے پانی میں زہر دینے سے ہی تمام مچھلیاں مری ہیں۔ انہوں نے کہا کہ تالاب کے پانی میں زہر ملانے کی تصدیق ہونے کے بعد کیمیکل کی مدد سے مچھلیوں کو بچانے کی ناکام کوشش کی گئی۔

ریاض الحق کا کہنا ہے کہ پنچایت کو اس کی اطلاع دی گئی اور نقصان کی بھر پائی کے لیے مالی مدد کا مطالبہ کیا گیا ہے۔ پنچایت پردھان شیخ عالمگیر رضا چودھری نے کہا کہ پورے معاملے کی تفصیلی معلومات حاصل کی جارہی ہے اور تفتیش کی جاری ہے۔

انہوں نے کہا کہ یہ تالاب پنچایت کا ہے۔ اسے ریاض الحق کو لیز پر دیا گیا ہے۔ اس واقعے سے ریاض کو لاکھوں روپے کا نقصان ہوا ہے۔

پنچایت کے سربراہ کا کہنا ہے کہ اس معاملے کو لیکر ایک میٹنگ کی جائے گی اور اس کے بعد کیئر ٹیکر کو مالی مدد کرنے کا فیصلہ کیا جائے گا۔