وزیر داخلہ امت شاہ آئندہ 31 جنوری کو مغربی بنگال دو روزہ دورے کے دوران شمالی 24 پرگنہ کے بنگاؤں کے ٹھاکر گڑھ بھی جائیں گے۔
شمالی 24 پرگنہ کے بنگاؤں کے ٹھاکر نگر میں امت شاہ متوا سماج سے خطاب کریں گے۔ یہ جلسہ متوا سماج کے لئے کافی اہم سمجھا جا رہا ہے۔ ذرائع کے مطابق وزیر داخلہ امت شاہ شمالی 24 پرگنہ کے دورے کے دوران متوا سماج کے لئے شہریت کا اعلان کر سکتے ہیں۔
شمالی 24 پرگنہ کے بنگاؤں سے بی جے پی کے رکن پارلیمان شانتانو ٹھاکر نے کہا کہ ہم سب وزیر داخلہ امت شاہ کا استقبال کرنے کے لئے بیتابی سے انتظار کر رہے ہیں۔ انہوں نے کہا کہ امت شاہ کے جلسے کی تیاریاں مکمل ہو چکی ہے۔ ٹھاکر نگر میں رہنے والے متوا سماج کے لوگ بھی وزیر داخلہ امت شاہ کے استقبال کے لئے انتظار کر رہے ہیں۔
بی جے پی کے رکن پارلیمان شانتانو ٹھاکر کا کہنا ہے کہ وزیر داخلہ امت شاہ کا دورہ شمالی 24 پرگنہ کئی اعتبار سے اہمیت کا حامل ہے۔ متوا سماج کے لوگوں کو امت شاہ کے دورے سے بڑی امید ہے۔
انہوں نے کہا کہ امت شاہ اس دن متوا سماج کے لوگوں کے لئے شہریت کا اعلان کریں گے۔ اس اعلان کا بے صبری سے انتظار ہے۔ بی جے پی کے رکن پارلیمان کے مطابق متوا سماج کے لوگوں کے لئے شہریت کا اعلان نہیں کیا جائے گا تو ان لوگوں (متوا سماج ) کے پاس دوسرا راستہ بھی موجود ہے۔
واضح رہے کہ بنگاؤں کے رکن پارلیمان شانتانو ٹھاکر متوا سماج کے لوگوں کے لئے شہریت ترمیمی قانون کا مطالبہ کر رہے ہیں۔ شہریت ترمیمی قانون کو نافذ کرنے میں تاخیر کرنے پر رکن پارلیمان شانتانو ٹھاکر نے اپنی پارٹی بی جے پی سے دوری بنالی تھی۔
