کڑواہٹ مٹھاس میں تبدیل: ممتا بنرجی کا وزیراعظم کو آم کا تحفہ

مغربی بنگال انتخابات کے دوران اور اس کے بعد مرکز کی مودی سرکار اور ممتا بنرجی کے درمیان جاری تلخ بیانی کم ہونے کے آثار دکھائی دے رہے ہیں، اس کی وجہ یہ ہے کہ ممتا بنرجی نے وزیراعظم مودی سمیت ملک کے دیگر رہنماؤں کو آم کا تحفہ بھیجا ہے۔

مغربی بنگال کی وزیراعلیٰ ممتا بنرجی نے ہر سال کی طرح امسال بھی وزیراعظم نریندر مودی سمیت کئی رہنماؤں کو آم کا تحفہ بھیجا ہے۔

ٹی ایم سی سربراہ ممتا بنرجی نے وزیراعظم مودی کے ساتھ مرکزی وزیر داخلہ امت شاہ، وزیر دفاع راج ناتھ سنگھ، کانگریس صدر سونیا گاندھی، دہلی کے وزیراعلیٰ اروند کیجریوال، آر جے ڈی سپریمو لالو پرساد یادو سمیت دیگر لیڈران کو کئی قسم کے آم بھیجے ہیں۔

وزیراعظم نریندر مودی کو بنگال کا مشہور آم لنگڑا، ہیم ساگر اور لکشمن آم بھیجے ہیں. اس طرح سے بنگال انتخابات کے بعد مرکزی سرکار اور ممتا کے بیچ کڑواہٹ کو دور کرنے کی سمت میں اچھی پہل کے طور پر دیکھا جارہا ہے۔