Richest and Poorest CM in India ممتابنرجی ملک کی سب سے غریب تو جگن موہن ریڈی سب سے امیر وزیراعلیٰ

ترنمول کانگریس کی سربراہ ممتابنرجی ملک کی تمام ریاستوں کے وزرائے اعلیٰ میں سے غریب ہیں جبکہ آندھرا پردیش کے جگن موہن ریڈی سب سے امیر وزیراعلیٰ ہیں۔ ممتا بنرجی کی جائیداد صرف 15 لاکھ روپے ہے جبکہ جگ موہن ریڈی کی کل جائیداد تقریباً 510 کروڑ روپئے ہے۔

کولکاتا: مغربی بنگال کی وزیر اعلیٰ ممتا بنرجی ملک کی مختلف ریاستوں کے وزرائے اعلیٰ میں سب سے غریب ہیں۔ ملک کی 30 ریاستوں اور مرکز کے زیر انتظام علاقوں کے وزرائے اعلیٰ میں ممتا بنرجی کی جائیداد سب سے کم یعنی صرف 15 لاکھ روپے ہے۔ یہ معلومات 28 ریاستوں اور 2 مرکز کے زیر انتظام علاقوں کے وزرائے اعلیٰ کی طرف سے الیکشن کمیشن میں جمع کرائے گئے حلف نامے پر مبنی رپورٹ میں سامنے آئی ہے۔ وہیں جموں و کشمیر میں فی الحال کوئی وزیر اعلیٰ نہیں ہے۔ اعداد و شمار کے مطابق ملک میں سب سے امیر وزیراعلیٰ آندھرا پردیش کے جگ موہن ریڈی ہیں، ان کی کل جائیداد تقریباً 510 کروڑ ہے۔

قابل ذکر ہے کہ ایسوسی ایشن فار ڈیموکریٹک ریفارمز (ADR) ملک میں مختلف سیاسی جماعتوں و انتخابی نتائج اور دیگر کاموں کو انجام دیتا ہے۔ ملک کی مختلف ریاستوں کے وزرائے اعلیٰ کی جائیداد سے متعلق معلومات حال ہی میں اسی تنظیم کی رپورٹ میں سامنے آئی ہے۔ یہ رپورٹ الیکشن کمیشن کو جمع کرائے گئے ڈیٹا کا تجزیہ کرکے تیار کی گئی ہے۔ رپورٹ کے مطابق ترنمول کانگریس کی سربراہ ممتا اس وقت ملک کی واحد وزیر اعلیٰ ہیں جن کے اثاثے ایک کروڑ روپے سے بھی کم ہیں۔

فہرست کے مطابق ممتابنرجی کے بعد کیرالہ کے وزیراعلیٰ پنار وجین کے پاس سب سے کم اثاثے ہیں۔ ان کے اثاثوں کی رقم ایک کروڑ روپے سے کچھ زیادہ ہے۔ ہریانہ کے وزیر اعلیٰ منوہر لال کھٹر کے پاس بھی تقریباً ایک کروڑ روپے کی غیر منقولہ جائیدادیں ہیں۔ اے ڈی آر کی رپورٹ میں یہ بھی کہا گیا ہے کہ اروناچل پردیش کے وزیر اعلیٰ پریما کھانڈو امیر ترین وزیر اعلیٰ کی فہرست میں آندھرا کے وزیر اعلیٰ کے بعد یعنی دوسرے نمبر پر ہیں۔ وہ 163 کروڑ روپے سے زیادہ کی جائیداد کے مالک ہیں۔ اوڈیشہ کے وزیر اعلی نوین پٹنائک کے کل اثاثے 63 کروڑ ہیں۔