کوچ بہار تشدد کی ذمہ دار ممتا بنرجی ہیں: امت شاہ

مغربی بنگال میں گزشتہ روز انتخابی مہم کے لیے یہاں آنے والے مرکزی وزیر داخلہ امت شاہ نے کوچ بہار کے سیتل کوچی میں تشدد کے دوران چار لوگوں کی موت کے لیے وزیراعلیٰ ممتابنرجی کو ذمہ دار ٹھہرایا ہے۔

وزیر داخلہ امت شاہ نے کہا کہ کوچ بہار تشدد ممتا دیدی کی بیان بازی کا نتیجہ ہے جس میں انہوں نے مرکزی فوج کا گھیراؤ کرنے کے لیے لوگوں کو اُکسایا تھا۔

امت شاہ نے مغربی بنگال کے عوام سے اگلے چار مراحل کی ووٹنگ کے لیے امن برقرار رکھنے کی اپیل کی اور اپنے پسندیدہ امیدوار کو منتخب کرنے کے لیے کہا۔

انہوں نے یقین دہانی کرائی کہ 2 مئی کے بعد بھارتیہ جنتا پارٹی (بی جے پی) کی حکومت بننے کے بعد ریاست مکمل طور پر تشدد سے پاک ہوگی۔ امت شاہ، نادیہ میں شانتی پور اسمبلی حلقہ میں پارٹی امیدوار جگناتھ سرکار کے لیے روڈ شو کا حصہ تھے۔

امت شاہ نے مزید کہا کہ 'کسی کی بھی موت تکلیف دہ ہے اور ترنمول کانگریس سربراہ کی اشعال انگیز تقریر کچھ روز پہلے سیتل کوچی میں کی گئی تھی جہاں چار لوگوں کی گولی لگنے سے موت ہوئی ہے۔

واضح رہے کہ سیتل کوچی اسمبلی حلقہ وہ جگہ ہے جہاں ممتا بنرجی نے رواں ہفتے ایک انتخابی ریلی سے خطاب کیا تھا۔

مغربی بنگال اسمبلی انتخابات کے پانچویں مرحلے میں شانتی پور کے حلقہ انتخاب میں 17 اپریل کو ووٹنگ ہوگی۔