وزیر اعلی ممتا بنرجی نے جوانوں کی ہلاکت پر افسوس کا اظہار کرتے ہوئے اعلان کیا ہے کہ بنگال سے تعلق رکھنے والے جوانوں کے اہل خانہ کو ریاستی حکومت کی جانب سے پانچ لاکھ اور گھر کے ایک فرد کو سرکاری ملازمت دی جائے گی۔
بنگال کے دو جوانوں کے اہل خانہ کو پانچ لاکھ دینےکا ممتا کا اعلان وزیر اعلی ممتا بنرجی نے آج ٹویٹ کرتے ہوئے لکھا ہے کہ 'مجھے یہ کہتے بہت تکلیف ہو رہی ہے کہ چین کے ساتھ گلوان میں جاری لڑائی میں ہندوستانی فوج کے کئی جوان مارے گئے ہیں۔ ان جوانوں میں دو جوان مغربی بنگال کے رہنے والے ہیں۔ سپاہی راجیش اورنگ بیربھوم ضلع کے بیلگھڑیا تھانہ کے محمد بازار کا رہنے والا ہے۔
دوسرا جوان علی پور دوار کے سموک تلہ کا رہنے والا ہے۔ اس عظیم قربانی کا کچھ بھی متبادل نہیں ہو سکتا ہے جو انہوں نے اپنے ملک کے لئے دی ہے۔ان کے اہل خانہ نے جو کھویا ہے اس کی تلافی بھی ممکن نہیں ہے۔ اس مشکل وقت میں ہم اپنے بہادروں کے ساتھ ہیں۔ ان کے اہل خانہ اس مشکل وقت میں مدد کے لئے ریاستی حکومت کی طرف سے پانچ لاکھ روپئے اور ان کے گھر کے ایک فرد کو سرکاری ملازمت دینے کا اعلان کرتی ہے'۔
واضح رہے کہ چین کے ساتھ جاری لڑائی میں سب سے پہلے جن تین جوانوں کے مارے جانے کی خبر آئی تھی ان میں سے دو جوانوں کا تعلق بنگال سے ہے۔ ہند چین کے درمیان لداخ میں جاری لڑائی میں ہوئے ہندوستانی جوانوں کی ہلاکت پر کولکاتا میں لوگوں کی طرف سے احتجاج بھی کیا جا رہا ہے۔
