Panchayat Poll Puzzle ووٹنگ کا بائیکاٹ کے باوجود بوتھ پر 95 فیصد پولنگ، عدالت نے جانچ کا حکم دیا

پنچایت انتخابات میں ایک بوتھ پر ووٹروں نے بائیکاٹ کیا اس کے باوجود اس بوتھ پر ووٹنگ کی شرح 95فیصد رہی۔منگل کو کلکتہ ہائی کورٹ نے ریاستی پولیس کے ڈی جی اور آئی جی کواس معاملے کی جانچ کرنے کی ہدایت دی ہے۔

کولکاتا:مغربی بنگال کے دارالحکومت کولکاتا میں واقع کلکتہ ہائی کورٹ کی جسٹس امرتا سنگھ نے اس سلسلے میں راجرہاٹ کے بی ڈی او کو طلب کیا ہے۔ ذرائع کے مطابق یہ واقعہ راجرہاٹ علاقے میں جنگا ہٹیارا پنچایت نمبر دو کے عبدالکلام کالج کے ایک بوتھ میں پیش آیا۔ مدعی کا دعویٰ ہے کہ ووٹرز نے کچھ مقامی مسائل کی وجہ سے ووٹنگ کا بائیکاٹ کیا۔ ووٹ ڈالنے جانے والوں کو بھی مبینہ طور پر روکا گیا تھا۔ لیکن دیکھا جا سکتا ہے کہ اس بوتھ پر 95 فیصد ووٹ ڈالے گئے ہیں۔

بائیکاٹ کے بعد بھی 95 فیصد ووٹ کیسے ڈالے گئے؟۔جسٹس سنگھ نے اس سلسلے میں راجرہاٹ کے بی ڈی او کو طلب کیا ہے۔ انہوں نے کہا کہ ڈی جی اور آئی جی پولیس افسر تعینات کرکے واقعے کی تحقیقات کریں گے۔ ریاست کے ڈی جی اور آئی جی کو 3 اگست کو عدالت میں رپورٹ پیش کرنی کی ہدایت دی گئی ہے۔

عام طور پر، اگر کسی بوتھ میں 90 فیصد سے زیادہ ووٹ پولنگ ہوتی ہے تو کمیشن پریزائیڈنگ افسر سے تصدیق کراتی ہے۔پریزائیڈنگ آفیسر کی ڈائری کی بنیاد پر دوبارہ الیکشن کرانے یا نہ کرنے کا فیصلہ کیا جاتا ہے۔ کمیشن کے مطابق یہ معلوم نہیں ہے کہ اس بوتھ کے معاملے میں ایسا ہوا ہے یا نہیں۔