Primary Recruitment Scam اساتذہ کی نوکریوں کومنسوخ کرنے کے فیصلے کو چیلنج کیا جائے گا، ممتا

ترنمول کانگریس کی سربراہ اور وزیراعلیٰ ممتابنرجی نے کلکتہ ہائی کورٹ کے 36 ہزار اساتذہ کی تقرری کو منسوخ کرنے کے فیصلے کو ڈویژن بینچ میں چیلنج کا کرنے کا فیصلہ کیا ہے۔

کولکاتا: مغربی بنگال کی وزیراعلیٰ ممتابنرجی نے کلکتہ ہائی کورٹ کے 36 ہزار اساتذہ کی تقرری کو منسوخ کرنے کے فیصلے کو ڈویژن بینچ میں چیلنج کا کرنے کا فیصلہ کیا ہے۔ کلکتہ ہائی کورٹ نے گذشتہ ہفتہ اپنے ایک غیر معمولی فیصلہ میں 36 ہزار پرائمری اساتذہ کی ملازمت کو یہ کہتے ہوئے برطرف کردیا تھا کہ یہ تقرریاں غیر قانونی طریقے سے ہوئی ہیں۔

اس پر رد عمل دیتے ہوئے وزیرا علیٰ ممتا بنرجی نے آج کہا کہ اس فیصلہ کے خلاف ڈویژ ن بنچ میں اپیل کی جائے گی۔ انہوں نے کہا کہ نوکریاں برطرف ہونے کے بعد ان کے پاس فون آرہے ہیں، لوگ پریشان ہیں، دو لاکھ لوگ بے روزگار ہو چکے ہیں۔ بہت سے لوگ ڈپریشن کا شکار ہیں۔ وزیرا علیٰ ممتا بنرجی نے کہا کہ لوگ فون کرکے درخواست کر رہے ہیں، انہیں بچالیں۔ ہم دوبارہ ڈویژن بنچ کے پاس جا رہے ہیں۔ ابھی بہت ساری تقرریاں باقی ہیں۔ مختلف دفاتر میں ملازمت ہے۔ میں عدالت پر الزام نہیں لگا رہی ہوں۔

انہوں نے کہا کہ ڈی اے کا شور مچانوں والوں کی وجہ سے آج یہ 36 ہزار نوکریاں چلی گئی ہیں۔ وزیر اعلیٰ نے کہا کہ ہم ڈویژن بنچ میں اس فیصلے پر اعتراض کریں گے۔ ہمارے وکیل بتائیں گے کہ اس فیصلے کی بنیاد کیا ہے۔ انہوں نے کہا کہ ہماری حکومت انسان دوست ہے اور ہم ہر فیصلے کو انسانیت کے تناطر میں تجزیہ کرتے ہیں۔

واضح رہے کہ گزشتہ روز کلکتہ ہائی کورٹ کے جسٹس ابھیجیت گانگوپادھیا نے 36 ہزار پرائمری اساتذہ کی ملازمت کو یہ کہتے ہوئے برطرف کردیا تھا کہ یہ تقرریاں غیر قانونی طریقے سے ہوئی ہیں۔