ترنمول کانگریس کی سربراہ ممتا بنرجی نے آج راج بھون میں مغربی بنگال کی وزیر اعلیٰ کی حیثیت سے تیسری مرتبہ حلف لیا۔
اس موقع پر گورنر جگدیپ دھنکر سمیت ترنمول کانگریس کے چند چنندہ سینئر رہنما حلف برداری تقریب میں موجود تھے۔ حلف برداری تقریب کے بعد گورنر مغربی بنگال جگدیپ دھنکر نے تیسری مرتبہ وزیراعلیٰ بننے والی ممتابنرجی کو مبارکباد دیتے ہوئے نیک خواہشات پیش کی۔
گورنر جگدیپ دھنکر نے ترنمول کانگریس کی سربراہ ممتا بنرجی کو تیسری مرتبہ وزیراعلیٰ بننے پر مبارکباد دی لیکن ریاست میں جاری سیاسی تصادم کو لے کر تنقید بھی کی۔
گورنر جگدیپ دھنکر نے کہا کہ میں امید کرتا ہوں کہ ممتا بنرجی کی ریاست میں جاری سیاسی جماعتوں کے درمیان جاری خونی جھڑپوں پر قابو پانا پہلی ترجیح ہو گی۔
انہوں نے کہا کہ جمہوریت میں انتخابات کے بعد سیاسی انتقام کی سیاست کے لئے کوئی جگہ نہیں ہے۔ ہم سبھی کو اس کا خیال رکھنا ضروری ہے۔
گورنر جگدیپ دھنکر کا کہنا ہے کہ سیاسی تصادم کے دوران جس طرح خواتین اور بچوں کو ہدف بنایا گیا وہ قابل مذمت ہے۔ اس معاملے میں ملوث لوگوں کے خلاف سخت کارروائی ہونی چاہیے۔
انہوں نے کہا کہ ممتا بنرجی بڑی بہن ہیں۔ تیسری مرتبہ وزیراعلیٰ بننے کے ساتھ ساتھ ان کی ذمہ داریاں بھی بڑھی ہیں۔ مجھے امید ہے کہ وہ بنگال کو تشدد سے پاک ایک ترقی یافتہ ریاست بنانے میں اہم رول ادا کریں گی۔
مزید پڑھیں:
مغربی بنگال کے گورنر جگدیپ دھنکر کے مطابق اس وقت ہمارے سامنے کورونا وائرس سے نمٹنے کا مشکل چیلنج کا سامنا ہے۔ انہوں نے کہا کہ ہم سبھوں کو مل جل کر اس بیماری کے خلاف لڑنے کی ضرورت ہے۔ متحد ہوں گے تو ہمیں کامیابی ملے گی۔
