مغربی بنگال کے گورنر جگدیپ دھنکر اور وزیر اعلیٰ ممتا بنرجی کی قیادت والی ریاستی حکومت کے درمیان کبھی ختم نہ ہونے والی بیان بازی کا سلسلہ جاری ہے۔
گورنر جگدیپ دھنکر اور وزیراعلیٰ اور حکمراں جماعت ترنمول کانگریس کی سربراہ کے درمیان سوشل میڈیا پر لفظی جنگ ایک بار پھر بھیانک شکل اختیار کر چکی ہے۔
دارجلنگ کے دورے سے واپسی پر گورنر جگدیپ دھنکر نے نامہ نگاروں سے بات چیت کرتے ہوئے کہاکہ دارجلنگ کی ترقی کے لیے مرکزی حکومت نے گورکھا ٹریٹوریل اتھارٹی (جی ٹی اے)( gorkha territorial authority ) کو کروڑوں روپے کے فنڈ دیئے لیکن اس کا خاطر خواہ استعمال نہیں کیا گیا۔انہوں نے کہاکہ جی ٹی اے بورڈ کے اراکین کے پاس ترقیاتی فنڈ کے اخراجات کے کوئی حساب کتاب نہیں ہیں۔ اس کے لیے کئی مرتبہ کمیٹی اور کمیشن بنائے گئے، لیکن اس سلسلے میں کبھی بھی کوئی تفصیلی رپورٹ منظر عام پر نہیں لائی گئی۔گورنر جگدیپ دھنکر کا کہنا ہے کہ وزیراعلیٰ ممتا بنرجی کو دارجلنگ کی ترقی اور یہاں رہنے والے لوگوں کی فلاح و بہبود کے کاموں کے لیے جو فنڈ دئیے گئے اس کی خبر لینی چاہیے۔'ان کا کہنا ہے کہ وزیراعلیٰ ممتا بنرجی نے اس کے لیے کمیٹی بھی تشکیل دی، لیکن اس معاملے کی رپورٹ کبھی بھی منظر عام پر نہیں لائی۔ میں نے بھی اس سلسلے میں کئی مرتبہ وزیراعلیٰ کو خط لکھا لیکن اس کا جواب اب تک نہیں ملا'۔
واضح رہے کہ وزیراعلیٰ بننے کے بعد ممتا بنرجی نے دارجلنگ کی ترقی کے لیے گورکھا ٹریٹوریل اتھارٹی (جی ٹی اے)( gorkha territorial authority ) بورڈ قائم کیا تھا۔ اس کے لیے مرکز سے فنڈز مہیا کرائی جاتی ہے۔
