Tripura Reports First Death Due to Dengue تریپورہ میں ڈینگو سے پہلی موت

تریپورہ میں ڈینگو سے پہلے مریض کی موت کا معاملہ سامنے آیا ہے جس کی وجہ سے محکمہ صحت کو مشکلات کا سامنا ہے۔

اگرتلہ: تریپورہ میں صحت کے حکام نے دعویٰ کیا کہ ان کے پاس کوئی تصدیق نہیں ہے، لیکن اسپتال انتظامیہ نے قبول کیا کہ 65 سالہ سبھاش سرکار کی موت ڈینگو سے ہوئی ہے۔ سیپاہی جالا ضلع کے سونامورا کے دھن پور کا رہنے والا سرکار 27 جولائی سے تیز بخار اور دست سے مبتلاتھا۔ متوفی کے بیٹے سریش سرکار نے کہا کہ ”وہ بے ہوش ہو گئے اور ان کے جسم کا درجہ حرارت غیر معمولی طور پر بڑھ گیا تھا۔

دھن پور اسپتال میں ابتدائی طبی امداد کے بعد انہیں سونامورا اسپتال لے جایا گیا، جہاں سرکار کو ڈینگو ہونے کا پتہ چلا۔ اس کے بعد انہیں فوری طور پر تریپورہ میڈیکل کالج اسپتال میں داخل کرایا گیا، لیکن اگلے دو دنوں تک ان کی صحت مسلسل بگڑتی رہی۔

سریش نے کہا، ”چونکہ ہم نے ان کی صحت میں کوئی بہتری نہیں دیکھی، ہم نے اسے ایک پرائیویٹ اسپتال میں داخل کرادیا۔ انہوں نے بہت کوشش کی، لیکن اس کی جان نہ بچا سکے۔”انہوں نے الزام لگایا کہ میڈیکل کالج کے ماہر ڈاکٹروں نے ایمرجنسی کی نشاندہی کرنے والی علامات کے باوجود مریض کا علاج نہیں کیا۔

اطلاعات کے مطابق اگرتلہ کے گورنمنٹ میڈیکل کالج میں ڈینگو سے متاثرہ 37 افراد زیر علاج ہیں جب کہ سونامورا کے مقامی اسپتالوں میں بڑی تعداد میں مریضوں کو داخل کرایا گیا ہے۔ تریپورہ حکومت نے پہلے ہی ریاست میں آنے والے تمام بنگلہ دیشی شہریوں کے لیے ڈینگو ٹیسٹ کو لازمی قرار دے دیا ہے۔

صحت کے سکریٹری ڈاکٹر دیباش باسو نے کہا، ”محکمہ صحت نے سونامورا کے متاثرہ علاقوں کے ہر گاؤں میں ہیلتھ کیمپس کا انعقاد کیا ہے اور صورتحال سے نمٹنے کے لیے طبی امداد کے ساتھ اضافی ڈاکٹروں کو تعینات کیا ہے۔“ انہوں نے کہا، ”ہم نے ہیلتھ ورکرز کو ہدایت دی ہے کہ بخار میں مبتلا لوگوں کی حالت کے حوالے سے گھر گھر جاکر جائزہ لیں۔ ریاست بھر میں ایک ایڈوائزری جاری کی گئی ہے کہ اگر کسی کو بخار ہو یا کوئی متعلقہ بیماری ہو تو اسپتال پہنچ جائیں۔

محکمہ صحت نے سونامورا کے متاثرہ دیہاتوں میں بڑی تعداد میں مچھردانیاں تقسیم کی ہیں اور لوگوں کو دن میں سوتے وقت بھی مچھر دانی کا استعمال کرنے کا مشورہ دیا ہے۔ سونامورا کے دوسری طرف بنگلہ دیش کے دیہاتوں میں بھی حال ہی میں ڈینگوپھیلنے کی اطلاع ملی ہے اور یہ خیال کیا جاتا ہے کہ مچھروں کی سرحد پار نقل و حرکت اس کے ہندوستانی علاقے میں پھیلنے کی وجہ ہو سکتی ہے۔

یو این آئی