ندیا:مغربی بنگال کے ندیا ضلع میں ترنمول کانگریس کے جنرل سیکریٹری ابھیشیک بنرجی کی نوبو جوار مہم کی تشہیر کے لئے آئے ریاستی وزیر فرہاد حکیم نے ریاست کے 21 میونسپلٹیوں میں سی بی آئی کی چھاپہ ماری مہم کو لے کر بی جے پی کی قیادت والی مرکزی حکومت پر جم کر بھڑاس نکالی۔ ریاستی وزیر اور کولکاتا میونسپل کارپوریشن کے مئیر فرہاد حکیم نے کہاکہ بی جے پی کی حکومت یہ ثابت کرنے کی ناکام کوشش کر رہی ہے کہ مغربی بنگال میں اس وقت بدعنوانی عروج پر ہے۔ دراصل وہ اپنی ناکامی پر پردہ ڈالنے کی کوشش کر رہی ہے۔
انہوں نے کہاکہ ترنمول کانگریس ماں ماٹی مانش کی سیاسی جماعت ہے۔مغربی بنگال کی عوام کو پارٹی کے بارے میں سب کچھ پتہ ہے۔ہمیں بنگال کے لوگوں کا سرٹفیکیٹ چاہئے۔جانچ ایجنسیوں کے نام پر ہمیں بنگال کے لوگوں کو ڈرانے کی کوشش کی جا رہی ہے- فرہاد حکیم نے کہا کہ ایجنسی کے نام پر ہمیں ڈرانے کی کوشش کی جا رہی ہے۔اس سے انہیں کچھ فائدہ ہونے والا نہیں ہے۔کارکنان کو مضبوط رہنے کا مشورہ دیتے ہوئے انہوں نے یہ بھی کہا کہ میں دیکھنا چاہتا ہوں کہ بی جے پی کے ہاتھ میں کتنی طاقت ہے کہ وہ مجھے کیسے کسی معاملے پھنسا سکتے ہیں۔