سڑک حادثے کے بعد مشتعل ہجوم کا پرتشدد مظاہرہ

سڑک حادثے میں ایک خاتون کی موت کے بعد کولکاتا کا ایم ایم بائی پاس، میدانِ جنگ میں تبدیل ہو گیا۔

مغربی بنگال کے کولکاتا کی مصروف ترین سڑکوں میں سے ایک ای ایم بائی پاس پر ہوئے سڑک حادثے میں ایک خاتون کی موت ہو گئی۔

اس سڑک حادثے کے بعد مقامی باشندوں نے پرتشدد مظاہرہ کرتے ہوئے ناکہ بندی کر دی جس سے آمدورفت ٹھپ پڑ گئی۔

پولیس کو حالات پر قابو پانے کے لیے لاٹھی چارج کرنا پڑا جس کے سبب افراتفری مچ گئی۔ پولیس اور مقامی باشندوں کے درمیان کافی دیر تک تکرار کا سلسلہ جاری رہا ۔

پولیس کا کہنا ہے کہ آج صبح کادا پاڑہ کے قریب چھنگڑی گھاٹا سے الٹاڈانگہ کی جانب جانے والی تیز رفتار گاڑی نے خاتون کو ٹکر مار دی۔

ٹکر اتنی زور دار تھی کہ خاتون موقع پر ہی ہلاک ہو گئی۔ خاتون کی شناخت گوری داس کے طور پر ہوئی ہے۔ اس کے بعد مشتعل ہجوم نے ناکہ بندی کر دی۔

پولیس کے مطابق مشتعل ہجوم نے لاری کے ڈرائیور اور خلاصی کو پیِٹ پیٹ کر شدید طور زخمی کر دیا۔

لاری کے ڈرائیور اور خلاصی کو تشویشناک حالت میں این آر ایس ہسپتال میں داخل کرایا گیا ہے۔ جہاں ان کی حالت نازک بتائی گئی ہے۔

مشتعل ہجوم کا کہنا ہے کہ سڑک پار کرنے کے دوران خاتون تیز رفتار گاڑی کی زد میں آگئی۔

لاری 20 فٹ تک خاتون کو گھسٹتے ہوئے لے کر چلی گئی جس کے سبب وہ موقع پر ہی ہلاک ہو گئی۔

خاتون میکے سے سسرال جا رہی تھی تبھی سڑک حادثے کا شکار ہوگئی۔

باشندوں کا کہنا ہے کہ ڈرائیور اور خلاصی دونوں نشے میں دھت تھے اور اسی وجہ سے یہ حادثہ پیش آیا۔