ED Raids another TMC House MLA ای ڈی کی رکن اسمبلی کرشنا کلیانی کی رہائش گاہ پر چھاپہ ماری

شمالی دیناج پور ضلع کے رائے گنج سے ترنمول کانگریس کے رکن اسمبلی کرشنا کلیانی کے گھر پر ای ڈی نے چھاپہ ماری مہم چلائی۔ بدھ کی صبح انفورسمنٹ ڈائریکٹوریٹ کی ایک ٹیم اچانک ان کے گھر میں داخل ہوئی۔ کسی کو گھر سے باہر جانے کی اجازت نہیں تھی۔

رائے گنج: مغربی بنگال میں انفورسمنٹ ڈائریکٹوریٹ اور سی بی آئی کی بدعنوانی کے مختلف معاملے میں جانچ جاری ہے۔ ایس ایس سی کے ذریعہ پرائمری اور اپر پرائمری اسکولوں میں اساتذہ کی تقرری میں بدعنوانی کی جانچ حکمراں جماعت ترنمول کانگریس کے لیے گلے کی ہڈی بن چکی ہے۔ ایس ایس سی اسکام میں ترنمول کانگریس کے کئی رہنما اس وقت جیل میں ہیں جب کہ متعدد رہنماؤں کے خلاف جانچ جاری ہے۔ اسی درمیان شمالی دیناج پور ضلع کے رائے گنج سے ترنمول کانگریس کے رکن اسمبلی کرشنا کلیانی کے گھر پر ای ڈی نے چھاپہ ماری مہم چلائی۔

ذرائع کے مطابق انفورسمنٹ ڈائریکٹوریٹ کے اہلکاروں نے بدھ کی صبح سات بجے رائے گنج سے رکن اسمبلی کرشنا کلیانی کے گھر پر چھاپہ ماری کی ۔ ای ڈی نے بیک وقت کرشنا کلیانی کے گھر، بلٹ شو روم، ترنمول کانگریس کے دفتر، کلیانی سولویکس، ٹرائب ٹی وی، وا بازار، پی آر ایم شاپنگ مال، ریلائنس اسمارٹ اور کرشنا کلیانی کے تمام کاروباری اداروں پر چھاپہ ماری کی۔

ترنمول کانگریس کے وارڈ نمبر 18 کے کوآرڈینیٹر اور کرشنا کلیانی کے بھائی پردیپ کلیانی نے بتایا کہ مرکزی انٹیلی جنس ایجنسی کی ٹیم اچانک رکن اسمبلی کے گھر میں داخل ہوئی۔ کسی کو گھر سے باہر نکلنے کی اجازت نہیں دی۔ انہوں نے مزید کہا کہ ابھی تک کچھ بھی سمجھ میں نہیں آ رہا ہے۔ اس سلسلے میں فی الحال واضح طور پر کچھ بھی کہا نہیں جا سکتا ہے۔