مغربی بنگال کی حکمراں جماعت ترنمول کانگریس کے رہنما سوگتا رائے نے کہا ہے کہ قانون سب کے لئے برابر ہوتا ہے۔ کسی ایک کے خلاف کارروائی اور دوسرے کو راحت نہیں دی جا سکتی ہے۔
رکن پارلیمان سوگتا رائے کا کہنا ہے کہ فرہاد حکیم، سبرتو مکھرجی اور مدن مترا کے خلاف کارروائی سیاسی انتقام کا نتیجہ ہے۔ یہ سب بی جے پی کے کہنے پر کیا جا رہا ہے۔
انہوں نے کہا کہ فرہاد حکیم، سبرتو مکھرجی اور مدن مترا کے خلاف کارروائی کی جا سکتی ہے تو مکل رائے اور شھبندو ادھیکاری کے خلاف کیوں نہیں؟
ترنمول کانگریس کے رہنما سوگتا رائے کا کہنا ہے کہ ناردا اسٹنگ آپریشن معاملے میں شھبندو ادھیکاری اور مکل رائے کے نام بھی شامل ہیں۔ لیکن دونوں ہی بی جے پی میں شامل ہوگئے اسی وجہ سے ان کے خلاف کارروائی نہیں کی جارہی ہے۔
انہوں نے کہا کہ سی بی آئی کو بلاتاخیر شھبندو ادھیکاری اور مکل رائے کو گرفتار کرنا چاہیے۔
مغربی بنگال کی سیاست میں آج اس وقت اچانک ہلچل مچ گئی جب سی بی آئی کی ٹیم ترنمول کانگریس کے چار اعلی رہنما فرہاد حکیم، سبرتو مکھرجی، مدن مترا اور شوبھن چٹرجی کو گھر سے اٹھا لے گئی۔
سی بی آئی ذرائع کے مطابق ناردا اسٹینگ آپریشن معاملے میں فرہاد حکیم، سبرتو مکھرجی، مدن مترا اور شوبھن چٹرجی کو پہلے حراست میں لیا گیا اور اس کے بعد گرفتاری عمل میں آئی ہے۔