مغربی بنگال کی کرکٹ ایسوسی ایشن آف بنگال نے ایڈن گارڈن میں کھیلے گئے ڈے نائٹ ٹیسٹ میچ کے تین دنوں کے اندر ہی ختم ہونے پر چوتھے اور پانچویں روز کے ٹکٹ کی رقم واپس کرنے کا اعلان کیا ہے۔
سی اے بی ذرائع کے مطابق جن لوگوں نے آن لائن ٹکٹ خریدے تھے ۔ انہیں رقم واپس کرنے کا پیغام بھیج دیا گیا ہے۔ رقم واپس کرنے کا سلسلہ بھی شروع کردیا گیا ہے۔
انہوں نے کہا کہ 'عام طور پر ایک بار ٹکٹ خریدنے کے بعد رقم واپس کرنے کی کوئی پالیسی نہیں ہے۔ بھارت اور بنگلہ دیش کے درمیان کھیلے گئے ڈے نائٹ ٹیسٹ میچ میں شائقین کواسٹیڈیم تک لانے کے لیے ادارے نے سیزن ٹکٹ کے بجائے ڈیلی ٹکٹ فروخت کرنے کا فیصلہ کیا تھا۔
سی اے بی کے مطابق ڈیلی ٹکٹ فروخت کرنے کا منصوبہ کامیاب رہا۔ امید سے زیادہ شائقین میچ دکھنے کے لیے اسٹیڈیم پہنچے۔ ہماری کوشش کامیاب رہی۔
سی اے بی ذرائع کے مطابق آئی سی سی کے اصل کے مطابق ٹکٹ کی رقم واپس نہیں کی جاتی ہے۔اگر میچ میں ایک گیندبھی پھینکی جاتی ہے توٹکٹ کی رقم واپس نہیں کی جاسکتی ہے۔
لیکن کولکاتا کا کیس بالکل مختلف ہے۔ یہاں کھیل کے دیوانوں میں ٹیسٹ میچ کی دلچسپی کو دیکھتے ہوئے ٹکٹ کی رقم واپس کرنے کا فیصلہ کیا گیا۔
واضح رہے کہ بھارتی کرکٹ کی تاریخ میں پہلی مرتبہ ایڈن گارڈن میں گلابی گیند سے ڈے نائٹ ٹیسٹ میچ کھیلا گیا۔اس دوران ایڈن گارڈن میں تقریبا60 ہزارشائقین موجود تھے۔ اس موقع پرمغربی بنگال کی وزیراعلیٰ ممتابنرجی اوربنگلہ دیش کی وزیراعظم شیخ حسینہ واجد توجہ کی مرکزرہیں۔اس کے علاوہ کپل دیو،سچن ٹیندولکر، انل کمبلے، محمداظہرالدین، وی وی ایس الکشمن اورثانیہ مرزا سمیت تمام مشہورشخصیات موجود تھیں۔
ایڈن گارڈن میں کھیلے گئے ڈے نائٹ ٹیسٹ میچ میں بنگلہ دیش کوشکست دے کر بھارتی ٹیم نے دومیچوں کی سیریز 0 ۔ 2 سے جیت لی۔ بھارتی ٹیم اس جیت کے ساتھ آئی سی سی ٹیسٹ رینکنگ میں اپنی پہلی پوزیشن برقرار رکھنے میں کامیاب رہی۔
