سی پی ایم رہنما محمد سلیم نے مالدہ کا دورہ کیا

سی پی ایم کے سرکردہ رہنما محمد سلیم نے مالدہ کے دورے کے دوران مقامی باشندوں سے ملاقات کی۔ جہاں انہوں نے ان کے مسائل کو سنتے ہوئے ندی کی وجہ سے زمین کٹاؤ کے مسئلے کو حکومت کے سامنے اٹھانے کی یقین دہانی کرائی۔

مغربی بنگال کے سی پی ایم رہنما محمد سلیم ان دنوں مالدہ ضلع کےدورے پر ہیں۔ مالدہ ضلع کے کالیاچک کے تین نمبر بلاک کے لوگوں سے ملاقات کرنے کے بعد انہوں نے کہا کہ یہاں ندی کے کنارے مٹی کا کٹاؤ سب سے سنگین مسئلہ ہے۔

انہوں نے کہا کہ ندی کے کنارے مٹی کٹاؤ کی وجہ سے اب تک تین سو سے زائد مکانات ندی میں غرق ہوچکے ہیں۔ کٹاؤ کے سبب اپنا سب کچھ کھو چکے لوگوں کو حکومت کی جانب سے اب تک کوئی مدد نہیں ملی ہے۔

سی پی ایم کے رہنما کا کہنا ہے کہ ندی کے کنارے رہنے والے لوگ بہت برے حال میں ہیں۔ ریاستی اور مرکزی حکومت کی جانب سے بے گھر ہونے والے لوگوں کو اب تک کوئی مدد نہیں ملی ہے۔

انہوں نے کہا کہ غریب لوگوں کی حمایت میں آواز بلند کرنا ہماری اولین ذمہ داری ہے۔ ہماری پارٹی اس مسئلے کو پہلے ریاستی حکومت تک لے جائے گی، اگر وہاں بات نہیں بنتی ہے تو ہم مرکزی حکومت کے پاس جائیں گے۔

دوسری طرف گاؤں میں رہنے والے محمد عبدالجبار نامی شخص نے کہا کہ ضلع انتظامیہ کی جانب سے کوئی مدد نہیں ملی۔ پردھان غلط اطلاع دیتے ہیں اس سے ہماری پریشانی بڑھ جاتی ہے۔

واضح رہے کہ مالدہ ضلع میں پودو ندی کی وجہ سے ندی کے کنارے مٹی کی کٹاؤ ایک سنگین مسئلہ بن گیا ہے۔ اس مسئلے کی وجہ سے سیکڑوں ایکڑ زمین ندی میں غرق ہو چکی ہے۔