ترنمول کانگریس کے خلاف کانگریس کی گورنر سے شکایت

مغربی بنگال پردیس کانگریس کے ایک وفد نے بنگال کے گورنر جگدیپ دھنکر سے ملاقات کرکے کانگریسی رہنما کی ریاستی حکومت کی تنقید کرنے پر گرفتاری اور زدوکوب کیے جانے کی شکایت کی اور کارروائی کا مطالبہ کیا۔

اس وفد میں پردیپ بھٹا چاریہ اور اپوزیشن رہنما عبدالمنان بھی شامل تھے۔

مغربی بنگال پردیس کانگریس کے رہنما سنموئے بندیوپدھیاے کی جانب سے ترنمول یوتھ کانگریس کے صدر ابھیشیک بنرجی اور ترنمول کانگریس کے جنرل سیکریٹری ممتا بنرجی پر سوشل میڈیا پر نکتہ چینی کرنے پر پولیس کارروائی کی پردیش کانگریس نے سخت مذمت کی۔

اس سلسلے میں آج پردیش کانگریس کی اعلیٰ قیادت نے گورنر بنگال جگدیپ دھنکر سے ملاقات کی اور انہیں اس پورے واقعہ سے واقف کرایا۔

گورنر سے ملاقات کے بعد ریاستی اسمبلی کے اپوزیشن رہنما عبدالمنان نے کہا کہ کانگریس رہنما سنمئے برجی کی غیر قانونی طریقے سے گرفتاری کی گئی۔

انہوں نے کہا کہ ممتا بنرجی کے بھتیجے پر نکتہ چینی کرنے کے جرم میں ان کے ساتھ جس طرح کا سلوک کیا گیا وہ جمہوری نظام کے لیے شرم کی بات ہے۔

وفد نے کہ کہ اس واقعہ کی دانشوروں کی جانب سے بھی مذمت کی گئی ہے اور اس کے خلاف دانشور طبقہ احتجاج کرے گا۔

کانگریس کے رہنما پردیپ بھٹا چاریہ نے کہا کہ اس پورے واقعہ سے ہم نے گورنر کو آگاہ کرایا ہے اور ان سے مطالبہ کیا ہے کہ وہ اس کے خلاف دستوری اقدامات کریں.

انہوں کہا کہ 'کیا جمہوریت میں حکومت کی نکتہ چینی نہیں کی جا سکتی ہے، کیا وزیر اعلیٰ ممتا بنرجی مرکزی حکومت اور وزیراعظم نریندرمودی کی سخت لہجے میں نکتہ چینی نہیں کرتی ہیں'۔

واضح رہے کہ کانگریسی رہنما سنموئے بندیوپدھیاے نے سوشل میڈیا پر ابھیشیک بنرجی پارتھو چٹرجی اور ممتا بنرجی پر نکتہ چینی کی تھی جس کے بعد پولیس نے ان کے گھر جاکر ان کو گرفتار کیا۔ پولیس پر ان کو زدوکوب کرنے کا بھی الزام لگایا گیا ہے۔