بنگال کے لوگوں نے سخت لاک ڈاؤن کا خیر مقدم کیا: وزیراعلیٰ ممتا بنرجی

وزیراعلیٰ ممتا بنرجی نے کہا کہ بنگال کے عوام نے سخت لاک ڈاؤن کے فیصلے کا خیر مقدم کیا۔ اس کی وجہ سے ہی کورونا وائرس کی دوسری لہر پر قابو پانے میں مدد ملی ہے۔

مغربی بنگال کے سکریٹریٹ بلڈنگ نبنو میں نامہ نگاروں سے خطاب کرتے ہوئے وزیراعلیٰ نے کہا کہ بنگال ملک کی پہلی ریاست ہے جسے کورونا وائرس کی دوسری لہر سے اتنی تیزی سے نجات مل رہی ہے۔

انہوں نے کہا کہ کورونا وائرس کی دوسری لہر کی رفتار سست پڑنے کے سبب یومیہ کیسز اور اموات شرح میں کمی آئی ہے لیکن خطرہ ٹلا نہیں ہے۔

وزیراعلیٰ ممتا بنرجی نے کہا کہ بنگال کے عوام نے سخت لاک ڈاؤن کے فیصلے کا خیر مقدم کیا ہے، ان کی وجہ سے ہی کورونا وائرس کی دوسری لہر پر قابو پانے میں مدد ملی ہے۔ 18 دنوں میں کورونا وائرس کے یومیہ کیسز 23 ہزار سے گھٹ کر 8 ہزار تک پہنچ چکی ہے اور یہ لاک ڈاون کے سبب ممکن ہو سکا ہے۔

انہوں نے کہا کہ سخت لاک ڈاؤن کے سبب عام لوگوں کو تھوڑی پریشانیوں کا سامنا کرنا پڑا ہے، لیکن نتیجہ مثبت آنے پر تشفی ہوئی ہے۔ لوگوں نے بھی لاک ڈاؤن کی بھرپور حمایت کی ہے۔

وزیراعلیٰ ممتا بنرجی کا کہنا ہے کہ دوسری ریاستوں کی طرح وہ مکمل لاک ڈاؤن کے خق میں نہیں ہیں، اس سے عام لوگوں کو دشواریوں کا سامنا کرنا پڑتا ہے اور معیشت بھی تباہ ہوتی ہے۔ کورونا وائرس کی دوسری لہر کو جڑ سے ختم کرنا ہے، اس درمیان لاک ڈاؤن بھی جاری رکھنا ہے اور ان سب کے درمیان عام لوگوں کو پریشانیوں سے بھی نجات دلانا ہے۔ رپورٹ کے مطابق اب تک 13،87،131 مریض صحتیاب ہو کر ہسپتالوں سے گھر واپس لوٹ چکے ہیں۔فعال کیسز کی تعداد 1،62،421تک پہنچ چکی ہے۔واضح رہے کہ مغربی بنگال میں کورونا وائرس کے مریضوں کی کل تعداد 13،98،881 تک پہنچ چکی ہے جبکہ اس بیماری سے اب تک 15،813 مریضوں کی موت ہو چکی ہے۔دوسری طرف طبی ماہرین نے ریاستی حکومت سے لاک ڈاؤن میں نرمی برتنے کے فیصلے پر دوبارہ غور کرنے کی اپیل کی ہے۔طبی ماہرین کا کہنا ہے کہ جون کے آخر تک سخت لاک ڈاؤن نافذ کیا جائے تاکہ کورونا وائرس کی دوسری لہر پر مکمل طور پر قابو پایا جاسکے جس سے تیسری لہر کو بے اثر بنانے میں مدد ملے گی۔