بی جے پی حکومت سے عوام کو فائدہ کم نقصان زیادہ ہوا: ممتا بنرجی

مغربی بنگال کی وزیراعلیٰ ممتا بنرجی نے بی جے پی کی قیادت والی مرکزی حکومت کی تنقید کرتے ہوئے کہا کہ اس حکومت سے عوام کو فائدہ کم نقصان زیادہ ہوا ہے۔

مغربی بنگال کے علی پور دوار میں انتخابی ریلی سے خطاب کرتے ہوئے وزیراعلیٰ ممتا بنرجی نے کہا کہ مرکز میں ایک ایسی حکومت ہے، جس سے عوام کو صرف نقصان ہی پہنچا ہے۔

انہوں نے کہا کہ مرکزی حکومت کی ناقص پالیسیوں کے سبب ملک کی معیشت پوری طرح سے تباہ و برباد ہو چکی ہے اور حیرت کی بات یہ ہے کہ اسے پٹری پر واپس لانے کے لئے اب تک خاطر خواہ قدم نہیں اٹھایا گیا ہے۔ وزیراعلیٰ نے کہا کہ کسان گزشتہ دو مہینوں سے زرعی قوانین کے خلاف احتجاج پر بیٹھے ہوئے ہیں لیکن حکومت کو کوئی اثر نہیں پڑ رہا ہے۔

ممتا بنرجی کا کہنا ہے کہ کسانوں کے مسائل کو حل کرنے کے لئے سنجیدہ ہونا پڑے گا۔ ڈیڑھ برس تک کے لئے زرعی قانون کو منسوخ کردیا گیا لیکن سوال یہ ہے کہ ڈیڑھ سال بعد کیا ہو گا۔ منافع بخش اداروں کی طرح کسانوں کے فصلوں کو بھی پرائیویٹ کمپنیوں کے ہاتھوں فروخت کرنے کا منصوبہ بنایا گیا ہے۔

ترنمول کانگریس کی سربراہ ممتا بنرجی نے کہا کہ کسانوں کو سڑکوں پر لانے کا منصوبہ بنایا گیا ہے۔ سخت محنت کرنے کے باوجود کسانوں کے ہاتھ کچھ نہیں لگنے والا ہے۔ کسان گزشتہ دو مہینوں سے زرعی قانون کی مخالفت کر رہے ہیں۔ انہیں کچھ تو غلط نظر آیا ہوگا۔

علی پور دوار میں عوامی جلسے کو خطاب کرتے ہوئے کہا کہ مغربی بنگال حکومت کو جی ایس ٹی کی بقیہ رقم مل جاتی ہے تو ریاست میں بے روزگاری کو جڑ سے ختم کرسکتے ہیں۔ ملک میں 40 فیصد بے روزگاری میں اضافہ ہوا ہے اس پر قابو پانے کے لئے کچھ بھی نہیں کیا گیا ہے۔ مغربی بنگال ملک کی واحد ریاست ہے جہاں سب سے کم بے روزگاری ہے۔