شمالی 24 پرگنہ میں ٹی ایم سی اور بی جے پی کے درمیان جھڑپوں کا سلسلہ جاری

شمالی 24 پرگنہ ضلع کے مختلف علاقوں میں ترنمول کانگریس اور بی جے پی کے حامیوں کے درمیان خونی جھڑپوں کا سلسلہ جاری ہے۔

مغربی بنگال اسمبلی انتخابات 2021 جیسے جیسے آگے بڑھ رہا سیاسی جماعتوں کے حامیوں کے درمیان بھیانک جھڑپوں کا سلسلہ جاری ہے۔

گزشتہ چوبیس گھنٹوں کے دوران شمالی 24 پرگنہ میں متعدد مقامات پر ترنمول کانگریس اور بی جے پی کے حامیوں کے درمیان جھڑپیں ہونے کی اطلاع موصول ہوئی ہے۔

مرکزی فورسز اور مغربی بنگال پولیس کی تعیناتی کے باوجود ضلع کے بیشتر علاقوں میں سیاسی جماعتوں کے درمیان جھڑپوں کا سلسلہ جاری ہے۔

شمالی 24 پرگنہ کے باراسات تھانہ علاقے میں پوسٹر اور بینر لگانے کے دوران ترنمول کانگریس اور بی جے پی کے حامیوں کے درمیان جھڑپ ہو گئی۔ اس دوران دونوں جانب سے 28 لوگوں کے زخمی ہونے کی اطلاع ہے، جس میں ترنمول کانگریس کے کاونسلر بھی شامل ہیں۔ انہیں شدید زخمی حالت میں نرسنگ ہوم داخل کرایا گیا ہے۔

ذرائع کے مطابق ترنمول کانگریس کے امیدوار اور اداکار چرن جیت کے ہورڈنگ کے سامنے بی جے پی کے امیدوار کا بینر لگانے کے دوران دونوں پارٹیوں کے حامی آمنے سامنے آگئے۔

دونوں جانب سے لاٹھیوں اور رڈ سے حملہ کیا گیا، جس میں متعدد افراد زخمی ہوگئے۔ اس واقعے کے بعد علاقے میں کشیدگی پھیل گئی۔

پولیس اور مرکزی فورسز نے جائے وقوعہ پر پہنچ کر حالات کو قابو میں کیا اور زخمیوں کو اسپتال میں داخل کرایا گیا۔

ترنمول کانگریس کے رہنما کا کہنا ہے کہ کاونسلر ارون برما پر جان لیوا حملہ کیا گیا ہے۔ بی جے پی کے حامیوں نے اس واردات کو انجام دیا ہے۔ بی جے پی کے رہنما نے ترنمول کانگریس کے الزام کو بے بنیاد قرار دیا ہے۔