ترنمول اور بی جے پی کے حامیوں کے درمیان تصادم

تیلجلہ تھانے کے تحت قصبہ علاقے میں ترنمول کانگریس اور بی جے پی کے حامیوں کے درمیان جھڑپ ہونے سے علاقے میں کشیدگی پھیل گئی۔

مغربی بنگال میں منعقد ہونے والے اسمبلی انتخابات کے مدنظر سیاسی جماعتوں کے درمیان پرتشدد واقعات میں زبردست اضافہ ہوا ہے۔ ریاست کے مختلف اضلاع میں حکمراں جماعت ترنمول کانگریس اور بی جے پی کے حامیوں کے درمیان تصادم کے واقعات کی خبریں موصول ہوتی رہی ہیں۔

گورنر جگدیپ دھنکر ریاست کے مختلف اضلاع میں سیاسی جماعتوں کے درمیان تصادم اور قتل عام کے لیے حکمراں جماعت ترنمول کانگریس کو ذمہ دار ٹھہراتے ہیں جبکہ حکمراں جماعت ترنمول کانگریس ریاست میں سیاسی جھڑپوں کے لیے بی جے پی کے بیرونی رہنماؤں کی اشتعال انگیز بیان بازی کو قصوروار قرار دے رہی ہے۔

جنوبی کولکاتا کے تلجلہ تھانہ کے تحت قصبہ علاقے میں ترنمول کانگریس اور بی جے پی کے حامیوں کے درمیان جم کر پتھراؤ اور لاٹھیوں سے حملہ کیا گیا۔ دونوں پارٹیوں کے حامیوں کو اس سے بھی من نہیں بھرا تو انہوں نے ایک دوسرے پر راڈ کا بھی استعمال کیا۔

دونوں پارٹیوں کے رہنما شکایت درج کرانے کے لیے تھانہ پہنچے تو وہاں بھی جھڑپوں کا سلسلہ جاری رہا۔ پولیس نے بڑی مشقت کے بعد حالات پر قابو پایا اور شکایت درج کرکے کارروائی کی۔ اس معاملے میں چند لوگوں کو حراست میں لیا گیا۔

ترنمول اور بی جے پی کے حامیوں کے درمیان تصادم

ترنمول کانگریس کے رہنما وجین لال مکھرجی نے کہا کہ ترنمول کےحامیوں پر غنڈہ گردی کرنے کا الزام بے بنیاد ہے۔ بی جے پی کی ریلی کے دوران چند لوگوں نے ترنمول کانگریس کے حامیوں کے گھروں پر پتھراؤ کیا جس کے بعد حالات بگڑ گئے۔دوسری طرف بی جے پی کے رہنما تپن سکدھر کا کہنا ہے کہ انہیں شکایت درج کرانے کا موقع نہیں دیا گیا۔