محمڈن اسپورٹنگ کو شکست دے کر ایف سی گوا ڈورنڈ کپ 2021 کا چمپیئن

ایڈورڈو بیڈیا کے ایکسٹرا ٹائم میں کیے گئے گول کی بدولت ایف سی گوا نے محمڈن اسپورٹنگ کو خطابی مقابلے میں 0۔1 سے شکست دے کر ڈورنڈ کپ 2021 کا خطاب اپنے نام کر لیا۔

مغربی بنگال کے شمالی 24 پرگنہ کے بدھان نگر میں واقع سالٹ لیک اسٹیڈیم میں میزبان ٹیم محمڈن اسپورٹنگ اور ایف سی گوا کے درمیان فائنل میچ کھیلا گیا۔

سالٹ لیک اسٹیڈیم میں ہزاروں پرستاروں کی موجودگی میں میزبان ٹیم محمڈن اسپورٹنگ اور آئی ایس ایل کی سابقہ چمپئن ٹیم ایف سی گوا کے درمیان زبردست کھیل کا مظاہرہ دیکھا گیا۔

پہلے ہاف میں دونوں ٹیموں کے درمیان دلچسپ اور سنسنی خیز مقابلہ دیکھنے کو ملا دونوں ٹیموں کی تمام تر کوششوں کے باوجود کوئی گول نہیں ہو سکا۔

دوسرے ہاف میں بھی محمڈن اسپورٹنگ اور ایف سی گوا کے درمیان جنگ جاری رہی دونوں ٹیموں کی جانب سے تابڑ توڑ حملے ہوئے۔

کھیل کے مقررہ وقت تک دونوں ٹیموں کے درمیان ایک دوسرے پر سبقت حاصل کرنے کی جنگ جاری رہی لیکن کسی کو گول کرنے میں کامیابی نہیں ملی۔

فائنل میچ کو نتیجہ خیز بنانے کے ایکسٹرا ٹائم کا سہارا لیا گیا۔ ایکسٹرا ٹائم کے پہلے ہاف میں ایف سی گوا نے ایڈورڈو بیڈیا کے گول کی بدولت ایک صفر کی سبقت حاصل کرلی۔

ایکسڑا ٹائم کے دوسرے ہاف میں محمڈن اسپورٹنگ کی تمام تر کوششوں کے باوجود اسکور برابر نہ ہوسکا۔

ایف سی گوا نے محمڈن اسپورٹنگ کو ایک صفر سے شکست دے کر 130واں ڈورنڈ کپ 2021 کا خطاب اپنے نام کر لیا۔ سالٹ لیک اسٹیڈیم میں تقریباً 55 ہزار شیدائیوں نے فائنل میچ کا بھر پور لطف اٹھایا۔