سابق پولیس کمشنرسے پوچھ گچھ

کولکاتا پولیس کے سابق پولیس کمشنر آئی پی ایس راجیو کمار آج روز ویلی چٹ فنڈ بد عنوانی کیس میں سی جے او کمپلیکس میں واقع سی بی آئی دفتر میں حاضر ہوئے۔

اس سے پہلے سی بی آئی کی جانب سے کولکاتا پولیس کے سابق پولیس کمشنرراجیو کمار کو سی بی آ ئی دفتر میں حاضر ہونے کے لیے کئی بار نوٹس جاری کیا گیا تھا لیکن چند وجوہات کی بنیاد پر سی بی آئی کے سامنے ان کی پیشی نہیں ہو سکی۔

موصولہ اطلاع کے مطابق آج کولکاتا پولیس کے سابق پولیس کمشنر راجیو کمار روز ویلی چٹ فنڈ بد عنوانی کیس میں سی بی آئی دفتر میں حاضر ہوئے۔ ان سے ڈھائی گھنٹے تک پوچھ گچھ کی گئی۔

سی بی آئی دفتر سے باہر نکلنے کے بعد راجیو کمار نے کہا کہ ہدات کے مطابق میں سی بی آ ئی کے دفتر میں حاضرہوا۔ میں نے اپنی طرف سے تفتیش میں تعاون کیا۔'

انہوں نے کہا کہ 'میں بے گناہ ہوں۔ سی بی آ ئی جب چاہے تب مجھے پوچھ تاچھ کے لیے طلب کر سکتی ہے۔ میں اس کے لیے پوری طرح سے تیار ہوں۔'

راجیو کمار کے وکیل نے کہا کہ 'میرے موکل کو پریشان کیا جارہا ہے۔ انہیں بار بار پوچھ گچھ کے لیے بلایا جا رہا ہے۔ اس سے میرے موکل کو پریشانی ہوتی ہے۔'

انہوں نے کہا کہ 'روز ویلی اور شاردا چٹ فنڈ بدعنوانی کیس ایک ایسا معاملہ ہے جس کی برسوں سے تحقیقات کی جارہی ہے لیکن اب تک سی بی آئی کسی نتیجے پر نہیں پہنچی ہے۔'

واضح رہے کہ شاردا اور روز ویلی چٹ فنڈ بدعوانی کیس میں کولکاتا پولیس کے سابق کمشنر راجیوکمار پر ثبوت مٹانے کا الزام ہے۔ رواں برس فروری میں سی بی آئی کی ٹیم سابق پولیس کمشنر کو گرفتار کرنے کے لیے ان کے گھر پہنچی تھی، وزیر اعلیٰ نے اس کی پرُزور مخالفت کی تھی۔

وزیراعلیٰ کی مخالفت کے بعد سی بی آئی کو خالی ہاتھوں راجیوکمار کی رہائش گاہ سے واپس لوٹنا پڑا تھا۔