کلکتہ یونیورسٹی کا شمار ملک کی قدیم ترین یونیورسٹیز میں ہوتا ہے۔ ملک کی کئی عظیم شخصیات نے اس یونیورسٹی سے تعلیم حاصل کی ہے۔ کلکتہ یونیورسٹی اپنے بلند تعلیمی معیار کی وجہ سے بھی مقبول ہے۔ یہی وجہ ہے کہ شنگھائی کی تنظیم اکیڈمِک رینکنگ آف ورلڈ یونیورسٹی کی رینکنگ میں پورے ملک میں اسے دوسرا مقام ملا۔
مغربی بنگال کی وزیراعلیٰ ممتا بنرجی نے اس کامیابی پر کلکتہ یونیورسٹی کے اساتذہ،انتظامی عملہ اور طلبہ کو مبارک باد پیش کی ہے۔
ممتا بنرجی نے اپنے ٹویٹ میں لکھا کہ 'مجھے یہ بات شیئر کرتے ہوئے خوشی ہورہی ہے کہ اکیڈمِک رینکنگ آف ورلڈ یونیورسٹی نے حکومت مغربی بنگال کو مطلع کیا کہ کلکتہ یونیورسٹی ملک کی صفحہ اول کی یونیورسٹیوں میں سے ایک ہے۔ اس کارنامہ پر میں یونیورسٹی کے اساتذہ، انتظامی عملہ اور طلبہ کو مبارک باد پیش کرتی ہوں۔
کلکتہ یونیورسٹی کے ایک نوٹیفکیشن کے مطابق شنگھائی اکیڈمِک رینکنگ آف ورلڈ یونیورسٹی 2021 میں کلکتہ یونیورسٹی کو ملک کی صفحہ اول کی یونیورسٹیوں میں جگہ دی گئی ہے۔ اس رینکنگ میں کلکتہ یونیورسٹی ملک کے بہترین تعلیمی ادارے انڈین انسٹی ٹیوٹ آف سائنس کے بعد دوسرے نمبر پر ہے۔
