بی جے پی رہنما سجاتا منڈل ترنمول کانگریس میں شامل

مغربی بنگال میں اسمبلی انتخابات کے پیش نظر جہاں ترنمول کانگریس کے کئی رہنما بی جے پی میں شامل ہو رہے ہیں وہیں آج بی جے پی کے رکن پارلیمان سومترا خان کی اہلیہ سجاتا منڈل نے ترنمول کانگریس میں شمولیت اختیار کرلی۔

مغربی بنگال میں عنقریب ہونے والے اسمبلی انتخابات کے پیش نظر سیاست میں ہر روز حیران کن تبدیلیاں رونما ہو رہی ہیں۔ اس دوران بی جے پی یووا مورچہ کے ریاستی صدر اور ایم پی سومترا خان کی اہلیہ سجاتا منڈل نے آج ترنمول کانگریس میں شمولیت اختیار کرلی۔


اس دوران جہاں ایک طرف لگاتار ترنمول کانگریس کے کئی بڑے رہنما بی جے پی میں شامل ہو رہے ہیں۔ تو وہیں بی جے پی سے بھی کئی اہم رہنما ترنمول کانگریس میں بھی شامل ہو ئے ہیں۔ آج بی جے پی کے ایم پی اور بی جے پی یووا مورچہ کے ریاستی صدر سومترا خان کی اہلیہ سجاتا منڈل ترنمول کانگریس میں شامل ہوئیں ہیں۔

سجاتا منڈل اس وقت خبروں میں آئی تھی جب انہوں نے سومترا خان کی غیر موجودگی میں گزشتہ لوک سبھا الیکشن میں وشنوپور سیٹ سے بی جے پی کو جیت دلانے میں اہم رول ادا کیا تھا۔ لیکن آج انہوں نے ترنمول بھون میں سوگتا رائے اور کنال گھوش کی موجودگی میں ترنمول کانگریس میں شمولیت اختیار کرلی۔

اس موقع پر سجاتا منڈل نے کہا کہ بی جے پی کے لئے ہم نے کئی طرح کی جد و جہد کی ہے اس کے بعد بھی ان کے ساتھ جو سلوک کیا گیا ہے اس سے وہ بہت دلبرداشتہ ہوئیں ہیں۔

انہوں نے کہا کہ پارٹی میں ان کو جو مقام ملنا چاہئے تھا وہ نہیں ملا۔ جس پارٹی کے خلاف میں لڑائی کر رہی تھی اسی پارٹی کے بد عنوان سیاستدانوں کو بی جے پی میں اہمیت مل رہی ہے۔ میں یہ سمجھنے سے قاصر ہوں کہ آخر بی جے پی کے پاس کونسا صابن ہے جو اس پارٹی میں شامل ہوتے ہی تمام گناہ دھل جارہے ہیں۔

سجاتا منڈل نے کہا کہ میں مفاد پرست نہیں ہوں لیکن مجھے بی جے پی میں وہ عزت و اہمیت نہیں ملی جس کی میں حقدار تھی اسی لئے میں نے ممتا بنرجی کے ساتھ کام کرنے کا فیصلہ کیا ہے۔ بی جے پی کے پاس وزیر اعلی کا کوئی چہرہ نہیں ہے۔ لیکن ہمارے پاس ہماری رہنما ممتا بنرجی موجودہ ہیں۔