Ravi Shankar Prasad ہم دنیا کو دکھانا چاہتے ہیں کہ ممتا بنگال کو کیسے چلا رہی ہیں

بھارتیہ جنتا پارٹی (بی جے پی) کی چار رکنی حقائق تلاش کرنے والی ٹیم کی قیادت کر رہے رکن پارلیمنٹ روی شنکر پرساد نے جمعرات کو کہا کہ وہ دنیا کو دکھانا چاہتے ہیں کہ مغربی بنگال کی وزیر اعلیٰ ممتا بنرجی ریاست کو کیسے چلا رہی ہیں۔

کولکاتا:مغربی بنگال کے گورنر سی وی آنند بوس کے ساتھ ٹیم کے دیگر ارکان اور ریاستی بی جے پی صدر سکانتا مجمدار سے ملاقات کے بعد رکن پارلیمان روی شنکر پرساد نے کہا کہ انہوں نے گورنر کو ریاست میں پھیلی دہشت گردی کے بارے میں آگاہ کیا۔ بی جے پی کے کن پارلیمان روی شنکر پرساد نے کہاکہ جب سے پنچایت انتخابات کی تاریخ کا اعلان کیا گیا، اپوزیشن کارکنوں کو حکمراں ترنمول کانگریس کی طرف سے ہراسانی کا سامنا کرنا پڑ رہا ہے۔ انہوں نے الزام لگایا کہ نتائج کے اعلان کے بعد بھی لوگ گھروں کو لوٹنے سے خوفزدہ ہیں۔

روی شنکر پرساد نے پوچھا کہ محترمہ ممتا بنرجی کی پولیس کوئی کارروائی کیوں نہیں کر رہی ہے۔بی جے پی کی ٹیم اب وہاں کے حالات کا جائزہ لینے کے لیے جنوبی 24 پرگنہ کی طرف جارہی ہے اور جمعہ کو شمالی بنگال کے لیے روانہ ہوگی۔ روی شنکر پرساد نے بدھ کو محترمہ بنرجی کی تنقید کرتے ہوئے ان پر ریاست میں جمہوریت کو شرمندہ کرنے کا الزام لگایا۔ انہوں نے پنچایت انتخابات سے متعلق تشدد میں اتنی جانوں کے ضیاع کو "بدقسمتی" قرار دیا اور محترمہ بنرجی پر تنقید کرتے ہوئے کہا، "آپ کی سیاست بائیں بازو کی حکومت سے بھی بدتر ہو گئی ہے۔انتخابی تشدد جمہوریت کے لیے بھی بہت خراب ہے۔

انہوں نے کہاکہ ان واقعات پر کانگریس لیڈر راہل گاندھی اور کمیونسٹ پارٹی آف انڈیا-مارکسسٹ (سی پی آئی-ایم) کے جنرل سکریٹری سیتارام یچوری کی خاموشی پر بھی حیرت کا اظہار کیا۔ بی جے پی کی چار رکنی فیکٹ فائنڈنگ ٹیم پر طنز کرتے ہوئے محترمہ بنرجی نے بدھ کو کہا کہ یہ مرکزی ٹیمیں 'بی جے پی تحفظ اور اشتعال انگیزی کمیٹی' کے سوا کچھ نہیں ہیں۔ انہوں نے کہاکہ بی جے پی نے تمام سیاسی شائستگی کو ترک کر دیا ہے۔ اگر میں غلط ہوں تو میں اپنے خلاف تمام سزاؤں کا خیر مقدم کرتی ہوں۔

ترنمول نے اپوزیشن بی جے پی پر سختی سے حملہ کیا اور کہا کہ بھگوا پارٹی ریاست میں لوگوں کا دل جیتنے میں ناکام رہنے کے بعد انتقام کا سہارا لے رہی ہے۔ انہوں نے ریاست میں قائد حزب اختلاف شوبھندو ادھیکاری پر تشدد بھڑکانے کا الزام بھی لگایا۔ ترنمول نے الزام لگایاکہ اپوزیشن پارٹیوں کی طرف سے بھڑکائی گئی تشدد کی آگ، جس میں ہمارے امیدوار اور پارٹی کارکن جل رہے ہیں، پنچایت انتخابات کے اختتام تک جاری ہے۔