مغربی بنگال کے دارالحکومت کولکاتا کے مانک تلہ اور اس سے متصل ضلع جنوبی 24 پرگنہ کے مہیش تلہ میں آتشزدگی کے دو مختلف واقعات میں لاکھوں کا نقصان ہونے کی اطلاع ہے۔
شمالی کولکاتا کے مانک تلہ علاقے میں واقع ایک بیٹری کارخانے کے گودام میں بھیانک آتشزدگی کا واقعہ پیش آنے سے افراتفری مچ گئی۔
فائر بریگیڈ کے گیارہ انجنوں کی مدد سے گھنٹوں کی مشقت کے بعد آگ پر قابو پایا جا سکا۔ اس واقعے میں کسی کے زخمی ہونے کی اطلاع نہیں ہے لیکن لاکھوں روپے کا نقصان ہوا ہے۔
فائر بریگیڈ کے اہلکار ایس پی داس نے کہا کہ بیٹری کارخانے میں آگ لگنے کی وجہ معلوم نہیں چل سکی ہے۔ ابتدائی تفتیش کے دوران پتہ چلا شارٹ سرکٹ کے سبب یہ واقعہ پیش آیا ہے۔
انہوں نے کہا کہ بروقت کارروائی کی وجہ سے آگ پر جلد قابو پایا جا سکا۔ اس واقعے میں کسی کے زخمی ہونے کی اطلاع نہیں ہے۔
دوسری طرف جنوبی 24 پرگنہ کے مہیش تلہ میں واقع سبزی منڈی کی پندرہ دکانیں جل کر راکھ ہو گئیں۔
فائر بریگیڈ کے پانچ انجنوں کی مدد سے گھنٹوں کی مشقت کے بعد آگ پر قابو پایا جا سکا۔ آگ لگنے کی وجہ یہاں بھی شارٹ سرکٹ بتائی گئی ہے۔
