مغربی بنگال: دارالحکومت کولکاتا میں واقع فٹبال کلب محمڈن اسپورٹنگ کو وزیراعلیٰ ممتا بنرجی کے ہاتھوں بنگا بیبھوشن ایوارڈ حاصل ہونے کے بعد کلب ٹینٹ میں جشن کا سلسلہ جاری ہے۔ اسی درمیان محمڈن اسپورٹنگ کلب کے جنرل سکریٹری دانش اقبال نے کہا کہ یہ صرف اعزاز نہیں ہے بلکہ ہماری ایماندارانہ کارکردگی کا ثمرہ ہے۔ یہ کھلاڑیوں کے مسلسل محنت کا نتیجہ ہے۔ انہوں نے کہا کہ کھلاڑیوں کی غیر معمولی کارکردگی کے سبب ہمیں مغربی بنگال کے اعلیٰ اعزاز سے نوازا گیا۔ ٹیم کے تمام کھلاڑی اس کے لیے مبارکباد کے مستحق ہیں۔
ان کا کہنا ہے کہ اگر ہمارے کھلاڑی اپنی شاندار کارکردگی کا مظاہرہ جاری رکھیں گے تو ٹیم محمڈن اسپورٹنگ کو آنے والے دنوں میں مزید اعزازات سے نوازا جا سکتا ہے۔ انہوں نے کہا کہ مغربی بنگال کی وزیراعلی ممتا بنرجی کا شکریہ۔ انہوں نے تاریخی فٹبال کلب کی بھارتی فٹبال میں خدمات کو سراہا۔ کلب اور پرستاروں کے لیے بنگلہ بیبھوشن ایوارڈ کئی اعتبار سے اہمیت کا حامل ہے۔