مغربی بنگال میں 24 ہزار اساتذہ کی تقرری کا اعلان

مغربی بنگال میں پرائمری اور اپر پرائمری میں 24 ہزار 500 اساتذہ کی تقرری کا اعلان کیا گیا ہے۔

ریاست مغربی بنگال کی وزیر اعلیٰ ممتا بنرجی نے ایک پریس کانفرنس کے دوران کہا کہ 'اس بار اساتذہ کی تقرری میں شفافیت کا خیال رکھا جائے گا، عدالت میں بار بار معاملہ جانے کی وجہ سے تقرری میں تاخیر ہوئی۔ ممتا بنرجی نے کہا کہ 'درگا پوجا کے بعد بھی مزید ساڑھے سات ہزار پرائمری ٹیچرز کی تقرری ہوگی۔'

مغربی بنگال میں گزشتہ کئی برسوں سے اساتذہ کی تقرری عمل میں نہیں آئی ہے۔ ہزاروں امیدواروں کے مقابلہ جاتی امتحانات میں کامیابی حاصل کرنے کے باوجود تقرری کا معاملہ التوا کا شکار رہا ہے۔

ممتا بنرجی نے پریس کانفرنس میں ایک اہم اعلان کرتے ہوئے کہا کہ 'درگا پوجا سے قبل 24500 پرائمری اور اپر پرائمری اساتذہ کی تقرری کی جائے گی۔ جب کہ آئندہ مارچ میں تقرری کی تمام کارروائی مکمل کرلی جائے گی۔

وزیر اعلیٰ ممتا بنرجی نے یقین دہانی کرائی ہے کہ 'جنہوں نے امتحان دیا ہے امتحان پاس کیا ہے جو مستحق ہیں ان کو ضرور نوکری ملی گی۔ عدالت میں معاملہ ہونے کی وجہ سے تقرری میں تاخیر ہوئی ہے۔