ریلی سے خطاب کرتے ہوئے انڈین سیکولر فرنٹ کے رہنما عباس صدیقی نے کہا کہ انتخابات میں اتحادی محاذ کی شاندار جیت کے لیے بھرپور کوشش کی جائے گی۔ انہوں نے واضح کیا کہ ان کی پارٹی اتحاد میں ایک حصہ دار کے طور پر شامل ہوئی ہے، انہیں خیرات نہیں اپنا حق چاہئے۔
بریگیڈ پریڈ میدان میں منعقد ہوئی ریلی میں تینوں جماعتوں کے کارکنوں کی بڑی تعداد نے شرکت کی۔ وہیں محاذ کے اعلیٰ قائدین شہ نشین پر موجود تھے۔ انڈین سیکولر فرنٹ کے رہنما عباس صدیقی نے ریلی کو خطاب کرتے ہوئے ریاستی اور مرکزی حکومت پر جم کر نکتہ چینی کی۔ اس موقع پر انہوں نے اپنے اتحادیوں پر بھی واضح کردیا کہ وہ محاذ میں برابر کے حصہ دار ہیں۔ عباس صدیقی نے کہا کہ ’بھارتی ہونے پر فخر ہیں اور ان کا اصل مقصد ترنمول کانگریس اور بی جے پی کو شکست دینا ہے‘۔
واضح رہے کہ محاذ نے انڈین سیکولر فرنٹ کو 30 نشتیں دی ہیں جبکہ اس سلسلہ میں کانگریس کی جانب سے کوئی حتمی فیصلہ نہیں کیا گیا۔ ذرائع کے مطابق کانگریس پارٹی، انڈین سیکولر فرنٹ کو زیادہ اہمیت نہیں دینا چاہتی یہی وجہ ہے کہ عباس صدیقی نے کانگریس کی طرف اشارہ کرتے ہوئے کہا کہ ’ہم حصہ دار ہیں‘۔
