کانگریس کو بایاں محاذ کے رحم و کرم کی کوئی ضرورت نہیں ہے: سومن مترا

بایاں محاذ کے ذریعہ 38 سیٹوں پر امیدواروں کے نام کا اعلان کیے جانے پر اپنے رد عمل کا ظاہر کرتے ہوئے بنگال کانگریس کے صدر سومن مترا نے کہا کہ اب بایاں محاذ کے ساتھ بات چیت کا امکان نہیں ہے اور ہمیں بایاں محاذ کی جانب سے کسی ہمدردی اور رحم کی ضرورت نہیں ہے۔

17 ویں لوک سبھا انتخابات کانگریس اور بایاں محاذ نے متحد ہوکر انتخاب لڑنے کا فیصلہ کیا تھا مگر گزشتہ ہفتہ بایاں محاذ نے یک طرفہ 25امیدواروں کے نام کا اعلان کردیا، اور آج چار سیٹیں چھوڑ کر ریاست کے 38سیٹوں پر امیدواروں کے نام کا اعلان کردیا۔

جن چار سیٹوں پر ابھی امیدوار کے نام کا اعلان نہیں کیا ہے وہ کانگریس کی جیتی ہوئی سیٹیں ہیں، اس کے ذریعہ بایاں محاذ نے ابھی بات چیت کادروازہ کھلا رکھا ہے، یہی وجہ ہے کہ بمان بوس نے کہا کہ یہ لسٹ فائنل نہیں ہے اگر کانگریس اتحاد کیلئے تیار نہیں ہوئی تو بقیہ چار سیٹوں پر امیدواروں کے نام کا اعلان کردیا جائے گا۔

قابل ذکر ہے کہ کانگریس نے اشارہ دیا ہے کہ وہ اب بایاں محاذ کے ساتھ بات چیت کیلئے تیار نہیں ہے اور اکیلے ہی ریاست کی تمام سیٹوں پر انتخاب لڑے گی۔