بھارت ۔ چین کو جوڑنے والی ویلی بریج منہدم

چین کی سرحد تک جانے والے ملم روڈ کی واحد ویلی بریج اوورلوڈنگ کے سبب آج اچانک منہدم ہو گئی۔ اس بریج کے ٹوٹنے سے سرحد پر تعینات آئی ٹی بی پی اور فوج کی سپلائی میں رخنہ پڑ گیا ہے۔

اتراکھنڈ میں چین کی سرحد تک جانے والے ملم روڈ کا واحد پل آج اوورلوڈنگ کے باعث منہدم ہوگیا۔ اس حادثے میں ٹرک ڈرائیور سمت دو لوگ شدید طور پر زخمی ہوئے ہیں۔

آج اتراکھنڈ صوبے کے سرحدی ضلع پتھوراگڑھ کو منسیاری تحصیل میں چین بارڈر سے جوڑنے والی ویلی بریج منہدم ہو گئی۔ یہ حادثہ اس وقت ہوا، جب منسیاری۔ ملم روڈ پر پوک لینڈ مشین کو ایک ٹرالی لے جا رہا تھا۔ دھاپا کے پاس سینر نالے پر بنا پل اوورلوڈنگ کے سبب منہدم ہو گیا۔

اس پورے واقعے کا ویڈیو ایک راہگیر نے اپنے کیمرے میں قید کر لیا ہے۔

اس حادثے میں زخمی افراد منسیاری سی ایچ سی میں زیر علاج ہیں۔

اس پل کے منہدم ہونے سے سرحدی علاقے کے ایک درجن گاؤں کی 7000 سے زائد آبادی متاثر ہوئی ہے، ساتھ ہی سرحد پر تعینات آئی ٹی بی پی اور فوج کی سپلائی میں رخنہ پڑ گیا ہے۔

یہی نہیں پل منہدم ہونے سے ملم روڈ کا تعمیراتی کام بھی متاثر ہوا ہے۔