رامپور: کورونا کے پانچ مثبت معاملوں کی تصدیق

ریاست اترپردیش کے رامپور میں پانچ افراد کی کورونا رپورٹ مثبت آئی ہے، اس کو لیکر انتظامیہ الرٹ ہو گیا ہے۔ یہ تمام پانچوں افراد اتراکھنڈ کے ضلع ہلدوانی کے باشندے ہیں۔

الزام ہے کہ مراد آباد سے جنگل کے راستے اتراکھنڈ جا رہے تھے۔ رامپور کی سرحد سے گزرتے ہوئے پولیس نے گرفتار کیا تھا اور کورونا وائرس کے شبہ میں کوارنٹین پر کیا گیا تھا، جہاں آج ان کی رپورٹ مثبت آئی۔

دو روز قبل رامپور سے رپورٹ پیش کرتے ہوئے ہم نے آپ کو دکھایا تھا کہ ضلع رامپور کے ٹانڈہ میں ایک کمیونٹی ہیلتھ سینٹر میں تبلیغی جماعت سے وابستہ 17 ارکان کو کورونا وائرس کے شبہ میں کوارنٹین کیا گیا ہے۔ جس میں ضلع کے چیف میڈیکل آفیسر ڈاکٹر سبودھ کمار شرما نے ہمیں جانکاری دیتے ہوئے کہا تھا کہ رامپور میں آئے تبلیغی جماعت کے 17 ارکان کو کوارنٹین کیا گیا ہے اور ان تمام 17 افراد کی کورونا جانچ رپورٹ منفی آئی ہے، لیکن ان کو 14 دن مکمل ہونے پر ہی ہسپتال سے چھٹی دی جائے گی۔

لیکن آج اچانک جب ضلع کے سی ایم او دفتر سے یہ اطلاع ملی کہ رامپور میں پانچ افراد کی کورونا جانچ رپورٹ مثبت آئی ہے، تو اس کو لیکر ضلع میں افراتفری کا ماحول قائم ہو گیا۔

ہم نے آج ایک مرتبہ پھر اس متعلق سی ایم او ڈاکٹر سبودھ کمار شرما سے بات کی اور جاننے کی کوشش کی کہ آخر جب تمام 17 افراد کی کورونا رپورٹ منفی آ چکی ہے تو اچانک دوسرے دن ان میں سے پانچ افراد کی کس طرح مثبت رپورٹ ہوگئی۔

اپنی گذشتہ بات سے مختلف بات بتاتے ہوئے انہوں نے کہا کہ یہاں 17 میں سے 12 کو الگ وارڈ میں رکھا گیا تھا، جبکہ یہ پانچ افراد مرادآباد سے جنگل کے راستے چھپ کر اتراکھنڈ کے ضلع ہلدوانی اپنے گھر جا رہے تھے۔

تبھی رامپور چیک پوسٹ پر رامپور پولیس نے حراست میں لیکر کمیونٹی ہیلتھ سینٹر پہنچا دیا تھا جہاں ان کی کورونا رپورٹ مثبت آئی ہے۔

ساتھ ہی انہوں نے یہ بھی کہا کہ یہ جانکاری حاصل کرنے کی کوشش کی جا رہی ہے کہ یہ لوگ کن کن لوگوں کے رابطہ میں رہ چکے ہیں۔

وہیں ڈاکٹر سبودھ کمار شرما نے یہ بھی بتایا کہ جن پانچ افراد کی کورونا رپورٹ مثبت آئی ہے ان میں ظاہری طور پر کورونا وائرس کے سمپٹمس نظر نہیں آ رہے ہیں۔