اتراکھنڈ میں زلزلہ کے جھٹکے، دو زخمی

اتراکھنڈ کے ضلع باگیشور میں ہفتہ کی صبح زلزلے کے درمیانے جھٹکے محسوس کئے گئے ۔ زلزلے کے جھٹکے سے ایک مکان کو نقصان پہنچا اور ایک خاتون اور اس کی بیٹی زخمی ہوگئی۔

باگیشور کی ضلع مجسٹریٹ رنجنا راج گورو نے کہا کہ آج صبح چھ بج کر 31 منٹ پر ضلع میں ریکٹر اسکیل پر 4.7 شدت کے زلزلے کے جھٹکے محسوس کئے گئے ۔ زلزلے کا مرکز ضلع باگیشور کے گوگینا علاقے میں تھا۔

انہوں نے کہا کہ یہ پتھورا گڑھ - باگیشور ضلع کا سرحدی علاقہ ہے۔ پتھورا گڑھ میں جھٹکوں کے سبب لوگوں کے گھر سے باہر نکلنے کی اطلاع ہے۔

رنجنا راج گورو نے کہا کہ ابھی تک موصول اطلاعات کے مطابق تحصیل دگنا کری کے گاؤں كڑھائی دھار سرحدی علاقے میں لچھم رام کے مکان کو جزوی طور پر نقصان پہنچا ہے جس سے بسنتی دیوی (42) اور ریتا (11) زخمی ہو گئی۔ زخمیوں کو ضلع اسپتال میں داخل کرایا گیا ہے۔

ضلع مجسٹریٹ نے کہا کہ ابھی کسی دوسری جگہ سے کسی جانی نقصان کی اطلاع موصول نہیں ہوئی ہے ۔