اتراکھنڈ: 'بھارت جوڑو ترنگا یاترا' کا آغاز

ریاست اتراکھنڈ کے سابق وزیراعلی ہریش راوت نے کانگریس کارکنان کے ساتھ 'بھارت جوڑو ترنگا یاترا' کا آغاز دارالحکومت دہرادون سے کیا۔

اس دوران کانگریس سیوا دل کے قومی صدر لال جی بھائی دیسائی نے کہا کہ بی جے پی حکومت کے ذریعہ پھیلائی جانے والی نفرت کو ختم کرنے کے لیے ہی کانگریس سیوا دل ملک بھر میں بھارت جوڑو ترنگا یاترا کا اہتمام کر رہی ہے۔ جو آج اتراکھنڈ سے شروع ہو رہی ہے جس میں 75 کلومیٹر کے ترنگے کا سفر کیا جائے گا۔

سابق وزیر اعظم راجیو گاندھی کی 70 ویں سالگرہ کے موقع پر اس ترنگا یاترا کا اہتمام کیا جارہا ہے۔ جس میں دہرادون، ہریدوار، ررکی، لکسور، سلطان پور سمیت تمام علاقوں میں سے محبت اور اخلاص کا پیغام پہنچایا گیا ہے۔

اس کے اہتمام پر لکسر میں منعقد اجلاس میں اچاریہ پرمود کرشنم نے 'پلوامہ حملے کا الزام مودی حکومت پر عائد کرتے ہوئے کہا اس کے پیچھے مرکزی حکومت کی سازش ہے۔ لہذا پلوامہ حملے کی تفتیش ایس آئی ٹی سے کرائی جائے'۔

اس موقع پر ریاست کے سابق وزیراعلی ہریش راوت نے کہا کہ آج ملک میں کسانوں کی حالت بہت خراب ہے۔ کسان کے سامنے معاش کا بحران پیدا ہوگیا ہے اور مرکزی حکومت ملک میں لوگوں کو مذہب کی بنیاد پر تقسیم کر رہی ہے۔