ریاست اترپردیش کے وزیر اعلی یوگی آدتیہ ناتھ 18 اکتوبر کو رامپورآئیں گے ۔ وہ یہاں ضمنی انتخاب میں بی جے پی امیدوار بھارت بھوشن گپتا کی حمایت میں تشہیرکریں گے اور انتخابی جلسہ کو خطاب کریں گے۔
بی جے پی امیدوار کی حمایت میں رامپور آئیں گے یوگی رامپور میں 21 اکتوبر کو ہونے والے ضمنی انتخاب کے لئے چار امیدوار میدان میں ہیں۔ بی جے پی نے اپنا امیدوار بھارت بھوشن گپتا کو بنایا ہے۔ جو گذشتہ اسمبلی انتخاب بی ایس پی کے ٹکٹ سے لڑ چکے ہیں۔
بعد میں انہوں نے بھارتیہ جنتا پارٹی میں شمولیت اختیار کرلی تھی۔ یہی وجہ ہے کہ پارٹی نے دیگر دعویداروں کو درکنار کرتے ہوئے بھارت بھوشن کو اپنا امیدوار منتخب کیا ہے۔ بی جے پی کا سیدھا مقابلہ سماجوادی پارٹی کی امیدوار ڈاکٹر تزئین فاطمہ سے سے ہے جو اعظم خاں کی اہلیہ ہیں ۔
رامپور کو رکن پارلیمان اعظم خاں کا گڑھ سمجھا جاتا ہے۔ اعظم خاں رامپور میں مسلسل 9 مرتبہ ممبر اسمبلی منتخب ہوچکے ہیں اور چار مرتبہ وزیر فائز ہوئے ہیں۔ اب رکن پارلیمان بن جانے کے بعد انہوں نے اس سیٹ کو سماجوادی پارٹی کے خیمے میں 10 ویں مرتبہ بھی برقرار رکھنے کے لئے اپنی اہلیہ تزئین فاطمہ کو انتخابی میدان میں اتارا ہے۔
ادھر برسر اقتدار بی جے پی کسی بھی صورت میں یہ سیٹ اعظم خان کے خیمے میں اب دیکھنے کو تیار نہیں ہے۔ اسی لئے پارٹی نے ایڑی چوٹی کا زور لگا دیا ہے۔
خود وزیر اعلی یوگی آدتیہ ناتھ 18 اکتوبر کو رامپور پہنچیں گے۔ جہاں وہ بی جے پی کے امیدوار کی حمایت میں عوام سے ووٹ کی اپیل کریں گے۔
وزیر اعلی کا یہ دوسرا رامپور دورہ ہوگا۔ اس سے پہلے وہ چار مہینے قبل عام انتخابات میں بی جے پی کی امیدوار جیا پردہ کی حمایت میں آکر رامپور والوں سے ووٹ کی اپیل کر چکے ہیں۔
