سہارنپور: فرضی افسر گرفتار، جم کر کی گئی پٹائی

ریاست اترپردیش کے سہارنپور دیوبند علاقہ میں آنگن واڑی دفتر میں رجسٹروں کے معائنے کے لیے پہنچے فرضی افسر کو ملازمین نے دفتر میں ہی بند کرکے اس کی زبردست پٹائی کی اور بعد میں اسے پولیس کے حوالے کر دیا۔

ملزم پر کاروائی کے لیے آنگن واڑی ملازمین نے کوتوالی کا گھیراﺅ کرکے پولیس کو تحریری شکایت دی۔ موصولہ اطلاع کے مطابق سی ڈی پی او کی غیر حاضری میں ٹھیلا روڈ پر واقع آنگن واڑی کے دفتر پر پہنچے فرضی افسر کی پول اس وقت کھل گئی جب رجسٹروں کے معائنے کے دوران ایک ملازمہ نے شک ہونے پر اس کا شناختی کارڈ مانگ لیا۔ شناختی کارڈ مانگنے پر فرضی افسر بوکھلا گیا جس کے بعد وہاں پر موجود خواتین نے ہنگامہ شروع کر دیا اور اسے دفتر میں ہی یرغمال بنا لیا گیا۔ اس دوران اس کی زبردست پٹائی کی گئی۔

اطلاع ملنے پر موقع پر پہنچی پولیس نے فرضی افسر کو حراست میں لے لیا۔ ملزم کی شناخت تھانہ ناگل علاقہ کے گاﺅں کھٹولی کے رہنے والے اسلام ملک کے طور پر ہوئی ہے۔ کوتوالی میں جمع ملازمین نے الزام عائد کیا ہے کہ وہ ان سب سے ایک ایک ہزار روپے کا مطالبہ کر رہا تھا۔ کوتوالی پہنچی آنگن واڑی ملازمین کی بلاک صدر پارول رائے کی قیادت میں خواتین نے نعرہ بازی کرتے ہوئے کاروائی کا مطالبہ کیا۔ اسلام ملک پر الزام ہے کہ وہ مختلف محکموں میں آر ٹی آئی ڈال کر ناجائز وصولی کرتا تھا۔ تھانہ انچارج نے بتایا کہ ملزم کے خلاف تحریر ملنے پر کاروائی کی جائے گی۔ حالانکہ اس دوران کوتوالی میں سی ڈی پی او اور ڈی پی او بھی پہنچ گئے۔ اس موقع پر آنگن واڑی کے متعلق درجنوں خواتین شریک رہیں۔