ریاست اترپردیش کے ضلع سہارنپور کے دیوبند تھانہ کے میرگ پور گاوں کے رہائشی ہمانشو ولد سنسار سنگھ نے زہر کھا کر دیوبند سی او آفس پہنچے جہاں انہوں نے بتایا کہ پولیس میری مدد نہیں کررہی ہے، لہٰذا میں نے زہر کھا لیا ہے۔ پولیس نے فورا ہمانشو کو سرکاری اسپتال میں داخل کرایا جہاں ان کی حالت کو دیکھتے ہوئے ہائر سینٹر ریفر کر دیا گیا۔
ہمانشو نے بتایا کہ گاوں کے کچھ شرپسند نوجوان موٹرسائیکل پر گولیاں چلاتے ہیں اور اس کی ویڈیو مجھے بھیجتے ہیں اور کہتے ہیں کہ اگر ہمت ہے تو ہم سے ملاقات کر۔
ہمانشو نے مزید بتایا کہ موبائل بند کرنے کے بعد بھی مجھ کو مسلسل واٹس ایپ کے ذریعہ غلیظ گالیاں اور ویڈیو بھیجی جاتی ہیں، جس کی میں نے پولیس میں شکایت درج کرائی اور درخواست کی ہے کہ ان نوجوانوں کے خلاف کارروائی کی جائے لیکن اس کے باوجود بھی پولیس نے کوئی کارروائی نہیں کی، جس کے بعد میں نے زہر کھا لیا۔
وہیں ہمانشو کے والد سنسار نے بتایا کہ کچھ لڑکے ہمانشو کو باربار ہراساں کرنے کی کوشش کر رہے ہیں اور بدسلوکی کرتے ہیں، جس کی ہم نے پولیس سے بھی شکایت کی لیکن کوئی کارروائی نہیں ہوئی۔
ایس پی دیہات اتل شرما نے کہا کہ شکایت درج کر لی گئی ہے، اس سلسلے میں جانچ بھی جاری ہے، ملزمین کے خلاف سخت کارروائی کی جائے گی۔
