بارہ بنکی: حق رائے دہی کے لیے بیداری مہم

الیکشن کمیشن کی ہدایت پر حق رائے دہی کے تئیں بیداری مہم چلانے والے طلبا کے ضلع سطحی مقابلے کا آغاز ہو گیا ہے۔

اس کے تحت تمام ثقافتی پروگرامز کے مقابلے کرائے جا رہے ہیں۔ ان مقابلوں میں کامیاب ایک طالب علم یا اس کی جماعت کو 25 جنوری کو ہونے والے یوم حق رائے دہندہ کے موقع پر اعزاز سے سرفراز کیا جائے گا۔

بارہ بنکی کے گورنمنٹ گرلز انٹر کالج میں ہو رہے اس مقابلے میں گریجویٹ اور ثانوی درجہ کے طلبا حصہ لے رہے ہیں۔ یہ طلبا تقریر، گلوکاری، پینٹنگ، رقص، نکڑ ناٹک اور رنگولی بنانے جیسے مقابلے میں حصہ لے رہے ہیں۔

اس مقابلے کا مقصد طلبا کو ان کے سیاسی حقوق کے تئیں بیدار کرنا ہے تاکہ وہ حق رائے دہی کے استعمال سے بہتر اور مناسب شخص کا انتخاب کر سکیں۔ ان تمام مقابلے میں اول آنے والے شخص کو لکھنؤ میں ہونے والے ریاستی مقابلے میں بھیجا جائے گا۔ یہ مقابلہ 25 جنوری کو یوم حق رائے دہندہ کے موقع پر ہوگا، وہاں کامیاب طلبا کو الیکشن کمیشن اعزاز سے سرفراز کرے گا۔